އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ޗައިނާގެ މުދަލަށް ކަނޑައަޅާފައިވާ ބޮޑެތި ޓެރިފްތަކުން ނުވަތަ އިމްޕޯޓް ޑިއުޓީން ސަލާމަތްވުމަށްޓަކައި، ދުނިޔޭގެ 40 އަށްވުރެ ގިނަ ޤައުމަކުން ޗައިނާއަށް އެހީތެރިވަމުންދާކަމަށް ވައިޓް ހައުސްއިން ބުރާސްފަތި ދުވަހު ނެރުނު ރިޕޯޓެއްގައި ތުހުމަތުކޮށްފިއެވެ.
އެމެރިކާގެ ވައިޓް ހައުސްއިން ހާމަކުރި ގޮތުގައި، ޗައިނާގެ ކުންފުނިތަކުން އެމެރިކާއަށް މުދާ ފޮނުވުމުގައި ޓެރިފް ކުޑަ އެހެން ޤައުމުތައް މެދުވެރިކޮށް މުދާ ބަދަލުކުރުމުގެ އުކުޅުތައް ބޭނުންކުރަމުންދެއެވެ. މިގޮތަށް މުދާ ބަދަލުކުރުމުގެ ސަބަބުން އެމެރިކާގެ ޚަޒާނާއަށް އަހަރަކު 19 ބިލިއަނާއި 26 ބިލިއަން އެމެރިކާ ޑޮލަރާ ދެމެދުގެ ޢަދަދެއްގެ ގެއްލުންވަމުންދާކަމަށް އެމެރިކާގެ ރިޕޯޓުގައި ފާހަގަކޮށްފައިވެއެވެ.
ޗައިނާއަށް މިކަމުގައި އެހީތެރިވާ ޤައުމުތަކުގެ ތެރޭގައި އެމެރިކާއާ އަވަށްޓެރި ކެނެޑާ އާއި މެކްސިކޯގެ އިތުރުން އިންޑިއާ، ޖަޕާން އަދި ދެކުނު ކޮރެއާ ފަދަ ބޮޑެތި އިޤްތިޞާދުތައް ހިމެނޭކަމަށް ވައިޓް ހައުސްއިން ވަނީ ހާމަކޮށްފައެވެ. ވައިޓް ހައުސްގެ ވިޔަފާރިއާ ބެހޭ މުޝީރު ޕީޓާ ނަވާރޯ ވިދާޅުވީ، "މިއީ ޗައިނާއިން އެމެރިކާގެ ވަޒީފާތަކާއި ބިލިއަން ޑޮލަރުގެ އާމްދަނީ ފޭރިގަތުމަށްޓަކައި ހިންގަމުންދާ ވަރަށް ހީލަތްތެރި މުޢާމަލާތްތަކެއް" ކަމަށެވެ. އަދި މިފަދަ ޣައިރުޤާނޫނީ ވިޔަފާރީގެ ސަބަބުން އެމެރިކާގެ އުފެއްދުންތެރިކަމުގެ ދާއިރާއަށް ބޮޑެތި ގޮންޖެހުންތަކެއް ކުރިމަތިވަމުންދާކަމަށްވެސް އޭނާ ވިދާޅުވިއެވެ.
މި ތުހުމަތުތަކާ ގުޅިގެން ވޮޝިންގޓަންގައި ހުންނަ ޗައިނާގެ އެމްބަސީގެ ތަރުޖަމާނު ވިދާޅުވީ، "ވިޔަފާރީގެ ހަނގުރާމައަކުން އެއްވެސް ބަޔަކަށް ލިބޭނެ މޮޅެއް ނޯންނާނެ" ކަމަށެވެ. އަދި އެމެރިކާއިން އެއްފަރާތްތަކުން އަޅަމުންދާ ފިޔަވަޅުތަކުގެ ސަބަބުން ތިންވަނަ ޤައުމުތަކުގެ މަޞްލަޙަތަށް ގެއްލުންވެގެން ނުވާނެކަމަށްވެސް ޗައިނާގެ އެމްބަސީން ފާހަގަކުރެއްވިއެވެ. އެމެރިކާގެ ސަރުކާރުން މިހާރު ދަނީ މިފަދަ މުޢާމަލާތްތައް ދެނެގަތުމަށްޓަކައި އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ބޭނުންކުރުމަށް ތައްޔާރުވަމުންނެވެ. މީގެ އިތުރުން، ކުރިއަށް އޮތް ތަނުގައި ގައުމުތަކާއެކު ކުރެވޭ ވިޔަފާރީގެ އެއްބަސްވުންތަކުގައި، މިގޮތަށް މުދާ ބަދަލުކުރާ ގައުމުތަކަށް އަދަބު ދެވޭނެ ފަދަ ހަރުކަށި އުސޫލުތައް ހިމަނާނެކަމަށް އެމެރިކާގެ ސަރުކާރުން ވަނީ އިންޒާރުދީފައެވެ.
