އީރާނުން ޔުނައިޓެޑް އެރަބް އެމިރޭޓްސް (ޔޫއޭއީ) އަށް އަމާޒުކޮށް މިސައިލާއި ޑްރޯންގެ ހަމަލާތަކެއް ފޮނުވާލާފައިވާ ކަމަށާއި، މި ހަމަލާތައް ހުއްޓުވުމަށް އެ ގައުމުގެ ވައިގެ ދިފާއީ ނިޒާމުތަކުން ހަރަކާތްތެރިވަމުންދާ ކަމަށް ޔޫއޭއީގެ ޑިފެންސް މިނިސްޓްރީން ބުނެފިއެވެ.
ދުބާއީ ހިމެނޭހެން ބައެއް ސަރަހައްދުތަކުގެ މަތިން ގޮވުންތަކުގެ އަޑު އިވިފައިވާއިރު، ރައްކާތެރިކަން ހޯދުމަށް އާންމުންނަށް ވަނީ އިލްތިމާސްކޮށްފައެވެ.
މިއީ ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން އީރާނަށް ދިން ހަމަލާތަކުގެ ބަދަލުހިފުމުގެ ގޮތުން، ފެށުނު ހަނގުރާމައިގެ ތެރެއިން ދިން ހަމަލާއެކެވެ.
އެ ދުވަހުން ފެށިގެން އީރާނުން ވަނީ ޔޫއޭއީއަށް ސަތޭކައަށްވުރެ ގިނަ ބެލިސްޓިކް މިސައިލާއި އެތައް ހާސް ޑްރޯން ހަމަލާއެއް ފޮނުވާލާފައެވެ.
ޔޫއޭއީގެ އޮފިޝަލުން މި ހަމަލާތައް ކުށްވެރިކޮށް، މިއީ "އުދުވާނީ އަމަލުތަކެއް"ގެ ގޮތުގައި ވަނީ ސިފަކުރައްވާފައެވެ. ޔޫއޭއީގެ ތާޑް އަދި ޕޭޓްރިއޮޓް ފަދަ ވައިގެ ދިފާއީ ނިޒާމުތަކުން ވަނީ އަމާޒަށް ދަތުރުކުރި ގިނަ ހަމަލާތަކެއް ނާކާމިޔާބުކޮށްލާފައެވެ.
މި ހަނގުރާމައިގައި މިހާތަނަށް މީހުންގެ ފުރާނައަށް ލިބުނު ގެއްލުން ނިސްބަތުން މަދުވި ނަމަވެސް، އެގައުމުގެ އުމްރާނީ ވަސީލަތްތަކަށާއި އިގްތިސާދަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.
މިއަދު ދިން ހަމަލާތަކަށް ފަހު ފުޖައިރާ ޕެޓްރޯލިއަމް އިންޑަސްޓްރިއަލް ފެސިލިޓީގައި ވަނީ އަލިފާން ރޯވެފައެވެ. ނަމަވެސް މީހަކަށް އަނިޔާއެއްވި ކަމުގެ ރިޕޯޓެއް އަދި ލިބިފައި ނުވާއިރު، މަސްރަހު އަދިވެސް އޮތީ ވަރަށް ނުތަނަވަސްކޮށެވެ.
މި ހަމަލާއާއެކު ޔޫއޭއީގެ ވައިގެ ދަތުރު ފަތުރު ވަނީ ހުއްޓުމަކަށް އައިސްފައެވެ،
