އިތުރުކުރެވުނު ހަނގުރާމަ ހުއްޓާލުމުގެ މުއްދަތުގެ ތެރޭގައި އީރާނުން ހުށަހެޅި އެންމެ ފަހުގެ ހުށަހެޅުމާ މެދު ރައީސް ޑޮނަލްޑް ޓްރަމްޕް ހިތްހަމަނުޖެހޭ ކަމަށް އެމެރިކާގެ ގިނަ މީޑިއާ ރިޕޯޓްތަކެއް ބުނެފިއެވެ.
ވައިޓް ހައުސްއާ ގާތް ގުޅުމެއް އޮންނަ މަސްދަރުތަކުން ފޮކްސް ނިއުސް އަދި ބްލޫމްބާގަށް މައުލޫމާތު ދީފައިވާ ގޮތުގައި، އީރާނުގެ ނިއުކްލިއާ ޕްރޮގްރާމަށް ހުރަސްތަކެއް ކުރިމަތިކުރުމަށް އީރާނުން ދެކޮޅުހެދުމާއި، އެމެރިކާގެ ކަނޑުގެ ބްލޮކޭޑް (ހިސޯރުކުރުން) ވަގުތުން އުވާލުމަށް އެދިފައިވާތީ، ޓްރަމްޕް ވަނީ އެ ހުށަހެޅުމަކީ "ބަލިކަށި" އަދި "ސީރިއަސް ނޫން" ހުށަހެޅުމެއްގެ ގޮތުގައި ސިފަކުރައްވާފައެވެ.
އިތުރު ޑިޕްލޮމެޓިކް ފިޔަވަޅުތަކެއް އެޅުމަށް ނުވަތަ ދާއިމީކޮށް ހަނގުރާމަ ހުއްޓާލުމުގެ އެއްބަސްވުމަކަށް ދިއުމުގެ ކުރިން، އީރާނުން "މިއަށްވުރެ ވަރުގަދަ" ދޫދިނުންތަކެއް ބޭނުންވާ ކަމަށް ޓްރަމްޕް އޭނާގެ އެހީތެރިން ގާތު ވިދާޅުވި ކަމަށް ރިޕޯޓްތައް ބުނެއެވެ. އަދި ކަނޑުގެ ބްލޮކޭޑް ދެމެހެއްޓުމަށް އޭނާ ހުންނެވީ ސާބިތުކަމާއެކުގައެވެ.
މި ކުރިއެރުންތައް އައިސްފައިވަނީ އިސްލާމްއާބާދުގައި ބޭއްވުމަށް ހަމަޖެހިފައި އޮތް އެމެރިކާ-އީރާނު މަޝްވަރާތައް ކެންސަލްވުމާ ގުޅިގެންނާއި، އީރާނުގެ ފޮރިން މިނިސްޓަރު އައްބާސް އަރާގްޗީ ރަޝިޔާގެ އެހީތެރިކަން ހޯއްދެވުމަށް މޮސްކޯގައި މަޝްވަރާތައް ބާއްވަމުންދާ ދަނޑިވަޅެއްގައެވެ. ނާޒުކު ފައްތަރެއްގައި އޮތް ހަނގުރާމަ ހުއްޓާލުމުގެ އެއްބަސްވުން ކުރިއަށްދާއިރު، އައު ސުންގަޑިއެއް އަދި ކަނޑައަޅާފައެއް ނުވެއެވެ.
