މިދިޔަ މާރިޗު މަހު ފަހުކޮޅު "އަދަދު" ނޫހުން އާންމުކުރި ޑޮކިއުމެންޓަރީއެއްގެ މައްސަލައިގައި، އެ ނޫސް ހިންގާ އޮފީހުން ފުލުހުން ގެންދިޔަ ޑިވައިސްތަކުގެ ޕާސްވޯޑު ފުލުހުންނަށް ދިނުމަށް ކްރިމިނަލް ކޯޓުން އަމުރުކޮށްފިއެވެ.
އަދަދު ނޫހުން މައުލޫމާތު ދިން ގޮތުގައި، ކްރިމިނަލް ކޯޓުން އަމުރުކޮށްފައިވަނީ ފުލުހުން ގެންދިޔަ ޑިވައިސްތަކުގެ ތެރެއިން 4 މެކްބުކެއްގެ ޕާސްވޯޑު ދިނުމަށެވެ. އަދި އެ މެކްބުކްތަކުން ޑޭޓާ އެކްސްޓްރެކްޓް ކުރަންވާނީ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމްއެމްބީސީ) އިން ކަނޑައަޅާ ފަރާތެއްގެ ހާޒިރުގައި ކަމަށްވެސް ކޯޓުން ވަނީ އެންގަވައިފައެވެ.
ކޯޓު އަމުރުގެ މައިގަނޑު ކަންކަމާއި މައްސަލައިގެ ހުލާސާ:
-
މައުލޫމާތުގެ ސިއްރުހިފެހެއްޓުން: އެ ތަކެއްޗަކީ ނޫސްވެރިކަމާ ގުޅުންހުރި، ގާނޫނީ އިމްތިޔާޒު ލިބިގެންވާ ތަކެތި ކަމަށްވާތީ، އެކްސްޓްރެކްޓްކުރާ މައުލޫމާތުގެ ސިއްރު ހިފަހައްޓައި، ރައްކާތެރިކަމުގެ ފިޔަވަޅުތައް އަޅަން ކޯޓުން ވަނީ އަންގައިފައެވެ.
-
ސާމާނު ގެންދިޔަ ތާރީޚު: މި މައްސަލައިގެ ތަހުގީގަށް ފުލުހުން އަދަދު ނޫހުގެ އޮފީހުން ސާމާނުތައް ގެންދިޔައީ މިދިޔަ އޭޕްރިލް މަހުގެ 27 ވަނަ ދުވަހުގެރޭގައެވެ.
-
ޝަރީއަތް ކުރިއަށްދިއުން: މިދިޔަ މާރިޗު މަހުގެ ކޮންޓެންޓުގެ މައްސަލައިގައި، އެ ނޫހުގެ ސީއީއޯ ޙުސައިން ފިޔާޒު މޫސާއާއި މެނޭޖިން އެޑިޓަރު ޙަސަން މުޙައްމަދުގެ މައްޗަށް މިހާރުވެސް ޝަރީއަތް ދަނީ ކުރިއަށެވެ. މީގެއިތުރުން، މި މައްސަލައާ ގުޅިގެން އެ ނޫހުގެ ދެ ނޫސްވެރިން ކަމަށްވާ ލީވާން ޢަލީ ނާޞިރާއި މުހައްމަދު ޝަހުޒާން މީގެ ކުރިން ޖަލަށްވެސް ލާފައިވެއެވެ.
