ގދ. މަޑަވެލީގައި ކުރިއަށްދާ ބިން ހިއްކުމާއި ގޮނޑުދޮށް ހިމާޔަތް ކުރުމުގެ ބޮޑު މަޝްރޫއުގެ ދަށުން ބިން ހިއްކުމުގެ އަމަލީ މަސައްކަތްތައް ތާވަލާ އެއްގޮތަށް ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މިއަދު ހާމަކޮށްފިއެވެ.
2,000 އަށްވުރެ ބޮޑު އާބާދީއެއް އޮންނަ މަޑަވެއްޔަކީ ޒަމާނުއްސުރެ ބޯހިޔާވަހިކަމުގެ ތަދުމަޑުކަމާއި ބިމުގެ ޖާގައިގެ ދަތިކަން އިންތިހާއަށް ކުރިމަތިވެފައިވާ ރަށެކެވެ. މި މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން 174.58 މިލިއަން ރުފިޔާއަށް އެމްޓީސީސީއާ ހަވާލުކޮށްގެން ހިންގާ މި މަޝްރޫއަކީ 400 ދުވަސް ތެރޭގައި ނިންމުމަށް އަމާޒުހިފާފައިވާ މަޝްރޫއެކެވެ.
މި މަޝްރޫއުގެ މައިގަނޑު މަސައްކަތްތަކުގެ ތެރޭގައި ރަށުގެ އިހުތިސާސުގެ ތެރެއިން 19.17 ހެކްޓަރުގެ ބިން ހިއްކުން ހިމެނެއެވެ. އަދި ހިއްކާ ބިން ގިރުމުން ރައްކާތެރިކޮށް، ގޮނޑުދޮށް ހިމާޔަތްކުރުމުގެ ގޮތުން 1,645 މީޓަރުގެ ސަރަހައްދެއްގައި ރިވެޓްމަންޓް ޖެހުމާއި، 120 މީޓަރުގެ ސަރަހައްދެއްގައި ގްރޮއިން ޖެހުމުގެ މަސައްކަތް ވެސް މި މަޝްރޫއުގެ ތެރެއިން ކުރިއަށްދާނެއެވެ. އެމްޓީސީސީން މަޢުލޫމާތު ދޭ ގޮތުގައި މި މަޝްރޫޢު ނިމުމުން، މަޑަވެލީގެ އާބާދީއަށް ދިމާވެފައިވާ ބޯހިޔާވަހިކަމުގެ ދަތިކަމަށް ބޮޑު ލުޔެއްލިބި އިޖުތިމާއީ އަދި އިގްތިސާދީ ތަރައްގީއަށް އާ ފުރުސަތުތަކެއް ހުޅުވިގެންދާނެއެވެ.
