ތިނަދޫއަކީ ސިޓީއެއްގެ ގޮތުގައި ކަނޑައެޅުމަށް ސައްހަ ނޫން މައުލޫމާތު ހުށަހެޅި ކަމަށް ތުހުމަތުކުރެވޭ މައްސަލައިގައި، އެ ސިޓީގެ މޭޔަރު ސައުދު އަލީގެ މައްޗަށް އުފުލާފައިވާ ދައުވާތަކުގެ ޝަރީއަތް މާދަމާ ހެނދުނު 09:00 ގައި ކްރިމިނަލް ކޯޓުގައި ފެށުމަށް ތާވަލުކޮށްފިއެވެ.
މި މައްސަލައިގައި ސައުދުގެ މައްޗަށް ޕްރޮސެކިއުޓާ ޖެނެރަލްގެ އޮފީހުން ކޮށްފައިވަނީ އެނގި ހުރެ ސައްހަ ނޫން ލިޔުމެއް ދިނުމާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާއެވެ.
2024 ވަނަ އަހަރުން ފެށިގެން ފުލުހުން ތަހުގީގުކުރި މި މައްސަލައަކީ ތިނަދޫގެ އާބާދީގައި 10,150 މީހުން ހަމަވާ ކަމަށް ބުނެ، ސިޓީގެ ދަރަޖަ ހޯދުމަށް އޮޅުވާލައިގެން މައުލޫމާތު ހުށަހެޅި ކަމަށް ބުނެ ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ހުށަހެޅުއްވި މައްސަލައެކެވެ. ސައުދުގެ މައްޗަށް އުފުލާފައިވާ ދައުވާތައް ސާބިތުވެއްޖެނަމަ، އޭނާގެ މައްޗަށް ގިނަވެގެން ދެ އަހަރު ދުވަހުގެ ޖަލު ހުކުމެއް އަންނާނެއެވެ.
