ސެޕްޓެންބަރު މަހު މިފްކޯއަށް ކިރުވި މަހަށް 27 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ (މިފްކޯ) އިން ހާމަކޮށްފިއެވެ.
އެ ކުންފުނީގެ ތަފާސްހިސާބުތައް ދައްކާގޮތުން މިދިޔަ މަހު 453 ދޯންޏަކުން 1,288 ޓަނުގެ މަސް ކިރުވާފައިވާއިރު، އެ ތަކެއްޗަށް ޖުމްލަ 27,323,275 ރުފިޔާ ވަނީ ދޫކޮށްފައެވެ. އޭގެ ތެރޭގައި އެންމެ ގިނައީ ކަޅުބިލަމަހެވެ.
މަސްވެރިކަމުގެ ސިނާއަތް އިތުރަށް ފުޅާކުރުމަށް ސަރުކާރުން އިސްކަންދެމުންދާއިރު، މަސްވެރިން ބާނާ މަހަށް 48 ގަޑިއިރުގެ ތެރޭގައި މިހާރު ފައިސާ ދޫކުރަމުންދާކަން މިފްކޯއިން ފާހަގަކުރެއެވެ. އަދި މަސްވެރިންނަށް ޚާއްސަ އަގެއްގައި ދޫކުރާ ތެޔޮ މިހާރު 9 ސަރަހައްދަކުން ލިބެން ހުންނާނެކަމަށް މަސްވެރިކަމާ ބެހޭ ވުޒާރާއިން ވަނީ ވިދާޅުވެފައެވެ.
