މަގުމަތީގައި އުޅޭ ބުޅަލުގެ އާބާދީ އިތުރުވުމުގެ މައްސަލައަށް ހައްލެއް ހޯދައި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމުގެ މަގުސަދުގައި "ޕްރޮޖެކްޓް ބައުކާލޯ: ރައްކާތެރި، ސާފުތާހިރު އަދި އޯގާތެރި މުޖުތަމައެއް" ނަމުގައި ގައުމީ ފެންވަރުގެ މަޝްރޫއެއް އިފްތިތާހުކޮށްފިއެވެ.
މި މަޝްރޫއަކީ މަސްވެރިކަމާއި ދަނޑުވެރިކަމާ ބެހޭ ވުޒާރާއާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކުގެ އިތުރުން އިޖުތިމާއީ ޖަމިއްޔާތަކާއި ކަމާބެހޭ އިދާރާތައް ގުޅިގެން ކުރިއަށްގެންދާ ހަރަކާތެކެވެ.
މީގެ ކުރިން ދިވެހި ފޯކްލޯގައި ބިރުވެރިކަމާ ގުޅުވާފައިވާ "ބައުކާލޯ" މި ނަމަށް، މި މަޝްރޫއުގެ ތެރެއިން ވަނީ އޯގާތެރިކަމާއި، ޒިންމާދާރުކަން އަދި ރައްކާތެރިކަން ރަމްޒުކޮށްދޭ އާ މާނައެއް ދީފައެވެ.
މުޅި ރާއްޖެއަށް ފުޅާކުރުމުގެ އަމާޒުގައި މި މަޝްރޫއުގެ ފުރަތަމަ މަރުހަލާ ނަމޫނާ ނިޒާމެއްގެ ގޮތުގައި ހުޅުމާލޭގައި ފަށާފައިވާއިރު، މައިގަނޑު ބޭނުމަކީ ބުޅަލުގެ ވެލްފެއާ ރަނގަޅުކޮށް، އިންސާނީ އުސޫލުތަކުގެ ތެރެއިން އާބާދީ ކޮންޓްރޯލްކޮށްގެން އިންސާނުންނާއި ބުޅާ އެކުވެރިކަމާއެކު އުޅެވޭނެ މާހައުލެއް ގާއިމުކުރުމެވެ.
މި ގޮތުން ހުޅުމާލޭގައި ކުރިއަށްދާ ހަރަކާތްތަކުގެ ތެރޭގައި "ޓްރެޕް-ނިއުޓާ-ރިޓާން" (ޓީއެންއާރް) ޕްރޮގްރާމް މެދުވެރިކޮށް ބުޅާ ދަރިމައިވުން ހުއްޓުވުމާއި، ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމުގެ އިތުރުން ބުޅާ އެޑޮޕްޓްކުރުމަށް ބާރުއެޅުން ހިމެނެއެވެ. ކުރިއަށް އޮތް އަހަރުގެ ތެރޭގައި ޓީއެންއާރް ޕްރޮގްރާމްތަކުގެ އިތުރުން "ކެޓް ސޭފް ޕާކް" ތައް ގާއިމުކުރުމާއި، ކުޑަކުދިންނާއި ޒުވާނުންނަށް ހާއްސަކޮށްގެން ހޭލުންތެރިކަން އިތުރުކުރުމުގެ ގިނަ އަމަލީ ހަރަކާތްތަކެއް ހިންގުމަށް ވަނީ ރޭވިފައެވެ.
