މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމަށްޓަކައި "ޕްރޮޖެކްޓް ބައުކާލޯ" ގެ ނަމުގައި ގައުމީ މަޝްރޫއެއް ހުޅުމާލޭގައި އިފުތިތާހުކޮށްފިއެވެ.
މިއީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާއި، ޖަނަވާރުންގެ ހިމާޔަތުގައި މަސައްކަތްކުރާ ޖަމިއްޔާތަކާއި ކަމާބެހޭ އިދާރާތައް ގުޅިގެން ކުރިއަށްގެންދާ މަޝްރޫއެކެވެ.
މި މަޝްރޫއުގެ ފުރަތަމަ މަރުހަލާ ހުޅުމާލޭގައި ކުރިއަށްގެންދާއިރު، މައިގަނޑު އަމާޒަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުން ކަމަށް ދަނޑުވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވިއެވެ.
މި މަޝްރޫއުގެ ދަށުން "ޓްރެޕް-ނިއުޓާ-ރިޓާން" (ޓީއެންއާރް) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމާއި، ވެޓެރިނަރީ ފަރުވާ ދިނުމުގެ އިތުރުން "އޮޅުހިޔާ" ޝެލްޓާގެ ހާލަތު ރަނގަޅުކުރުމާއި، ބުޅާ އެޑޮޕްޓްކުރުމަށް ބާރުއެޅުމުގެ ހަރަކާތްތައް ކުރިއަށްދާނެއެވެ.
