އަމީނީ މަގުގެ ދެވަނަ ސެގްމަންޓުގެ މަރާމާތަށްޓަކައި މާފަންނު ޓާފް ދަނޑުން ފެށިގެން ހައުސިން މިނިސްޓްރީގެ ކުރީގެ އޮފީހާ ހަމައަށް އޮތް ސަރަހައްދު އާންމު ދަތުރުފަތުރަށް ބަންދުކޮށް، އެ ސަރަހައްދުގައި ޕާކުކޮށްފައި ހުރި ހުރިހާ އުޅަނދެއް މިރޭ ދަންވަރު 12:00 ގެ ކުރިން ނެގުމަށް ފުލުހުން އެދިއްޖެއެވެ.
ފުލުހުން އާންމުކުރި ޗާޓުގައިވާ ގޮތުން ޓްރެފިކް ފުލުހުންގެ އިދާރާއާއި މާފަންނު ދަނޑާ ދެމެދުގެ ސަރަހައްދަށް ހަތަރު ފުރޮޅުލީ އުޅަނދުފަހަރަކަށް ނުވަދެވޭނެއެވެ.
މި ސަރަހައްދު މަރާމާތުކުރަންޖެހުނީ ކުރީގެ ސަރުކާރުން 84.4 މިލިއަން ރުފިޔާއަށް އާރުޑީސީއާ ހަވާލުކޮށްގެން ހެދި އަމީނީ މަގުގެ އެންމެ ފަހު ސެގްމަންޓުގައި، ހާބަރު ފުޑްކޯޓު ސަރަހައްދުގެ ތާރުގަނޑު އުފުލި ދަތުރުފަތުރުކުރާ ފަރާތްތަކަށް ތަކުލީފުތަކާ ކުރިމަތިލާންޖެހި އާންމުންގެ ޝަކުވާ ބޮޑުވުމުންނެވެ. މީގެކުރިން ދިވެހިރާއްޖޭގެ އަޑު ކުރިމަތިން އޮންނަ ހަތަރު އަނގޮޅި ކަންމަތި ސަރަހައްދު ވަނީ މަރާމާތުކޮށް ތާރުއަޅައި ނިންމާލާފައެވެ.
