ހަށިގަނޑުގައި ޑަކްޓޭޕް އަޅައިގެން ގިނަ އަދަދެއްގެ މަސްތުވާތަކެތި އެތެރެކުރަން އުޅުނު މައްސަލައެއްގައި ށ. ނޫމަރާ، ހަވީރީގެ، ޢަބްދުﷲ ފަޞީޙުގެ މައްޗަށް ދައުލަތުން އުފުލި ދެ ދައުވާއެއް ސާބިތުވެ، އޭނާ 50 އަހަރަށް ޖަލަށް ލުމަށާއި 200,000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައަކީ 7 އޮކްޓޫބަރު 2024 ގައި ވެލާނާ އިންޓަނޭޝަނަލް އެއާޕޯޓުން ގއ. ކޫއްޑޫއަށް ފުރަން ގޮސް އުޅެނިކޮށް، ފަޞީޙުގެ ދެ ފައިގެ ފަލަމަސްގަނޑުގައި ޑަކްޓޭޕުން ތަތްކޮށްފައި ހުރި މަސްތުވާތަކެތި ފެނުނު މައްސަލައެކެވެ.
ކްރިމިނަލް ކޯޓުގައި ގާޟީ ޢަލީ ނަދީމް ކުރެއްވި ހުކުމުގައިވާ ގޮތުން، ފަޞީޙުގެ މައްޗަށް ސާބިތުވެފައިވަނީ މަސްތުވާތަކެއްޗާބެހޭ ގާނޫނުގެ ދަށުން އުފުލި ޑައިމޯފިން ޓްރެފިކްކުރުމުގެ ދައުވާއާއި ކެނެބިސް ޓްރެފިކްކުރުމުގެ ދައުވާއެވެ. އޭނާގެ ފަލަމަސްގަނޑުން 23.5976 ގްރާމްގެ ޑައިމޯފިން އަދި 252.1652 ގްރާމްގެ ކެނެބިސް ފެނިފައިވާތީ، ކޮންމެ ދައުވާއަކަށް އުމުރަށް ޖަލަށް ލުމާއެކު 100,000 ރުފިޔާއިން ޖޫރިމަނާކުރުމަށް ވަނީ ހުކުމްކޮށްފައެވެ. މި ދެ މައްސަލައިގެ ޖުމްލަ 200,000 ރުފިޔާގެ ޖޫރިމަނާ ފައިސާ 12 މަސްދުވަހުގެ ތެރޭގައި މީރާއަށް ދައްކަންޖެހެއެވެ.
ޝަރީއަތުގައި ދިފާއުން ފަޞީޙަކީ ހިއުމަން ޓްރެފިކިންގެ ވިކްޓިމެއް ކަމަށާއި މަޖުބޫރުން ކުރުވި ކަމެއް ކަމަށް ބުނި ނަމަވެސް، އެކަން ސާބިތުކޮށްދޭނެ ހެއްކެއް ހުށަހެޅިފައި ނުވާތީއާއި ތަހުގީގުގައި އޭނާ ހަނުހުރެފައިވާތީ އެ ދިފާއު ކޯޓުން ބަލައިގެންފައެއް ނުވެއެވެ. އެހެންކަމުން ދައުލަތުން ހުށަހެޅި ހެކިތަކުން ކުށް އެކަށީގެންވާ މިންވަރެއްގެ ޝައްކެއްނެތި ސާބިތުވާ ކަމަށް ކޯޓުން ވަނީ ކަނޑައަޅާފައެވެ.
