ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ އަސާސީ ގަވާއިދު އިސްލާހުކުރުމުގެ މަސައްކަތް އެ ޕާޓީގެ ކޮންގްރެސްގެ ތެރެއިން ފަށައިފިއެވެ. މާލެ ސިޓީ ހޯލުގައި ކުރިއަށްދާ މި ކޮންގްރެސްގެ މިއަދުގެ ސެޝަނުގައި އަސާސީ ގަވާއިދަށް އިސްލާހު ހުށަހެޅުމާއި ބަހުސްކުރުމުގެ އިތުރުން ގަރާރުތައް ހުށަހެޅުން ކުރިއަށްދާއިރު، މިއަދުގެ ބައްދަލުވުމުގައި 368 މަންދޫބުން ބައިވެރިވެފައިވެއެވެ.
ހުށަހެޅުނު އިސްލާހުތަކުގެ ތެރޭގައި ޕާޓީގެ ރައީސް އާއި ނައިބު ރައީސްގެ މަގާމު އުވާލައި އެންމެ އިސް މަގާމަކީ ޗެއާޕާސަން ކަމަށް ހަމަޖެއްސުމާއި، ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރުން ހިމެނެއެވެ. މީގެއިތުރުން ސިޔާސީ މަގާމުތަކާއި ސިޔާސަތުތައް ކަނޑައެޅުމުގައި ރަށްރަށުގެ ހިންގާ ކޮމިޓީގެ މަޝްވަރާ ހޯދުމަށާއި، ގައުމީ މަޖިލީހަށް އިންތިޚާބަކާ ނުލައި މީހުން އައްޔަންކުރާ އުސޫލު އުވާލުމަށް ވަނީ ހުށަހަޅާފައެވެ.
މި ކޮންގްރެސްގެ ތެރެއިން ޕާޓީގެ ޚަބަރުތަކާއި މައުލޫމާތު ހިމެނޭ އެމްޑީޕީގެ މޮބައިލް އެޕްލިކޭޝަނެއް ލޯންޗްކޮށްފައިވާއިރު، އިއްޔެ ބޭއްވި އިންވެސްޓް ފޯރަމާ ގުޅޭ އެއްބަސްވުންތަކުގައި މިއަދު ސޮއިކުރުމަށް ވަނީ ހަމަޖެހިފައެވެ. މި ކޮންގްރެސް ނިންމުމުގެ ރަސްމިއްޔާތު އޮންނާނީ މިރޭ 09:00 ގައެވެ.
