އާންމުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި ނުރައްކާތެރިކޮށް އުޅަނދު ދުއްވާ މީހުންގެ ވަނަވަރު އާންމުކޮށް، އެފަދަ އަމަލުތައް ތަކުރާރުކުރާ މީހުންނާ މެދު އިތުރު އިންޒާރަކާ ނުލައި ޖިނާއީ ތަހުގީގެއް ހިންގާނެ ކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ. ފުލުހުން ބުނި ގޮތުގައި، ނުރައްކާތެރިކޮށް ދުއްވާ މީހުން ދެނެގަނެ، އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ވަނީ ފަށާފައެވެ.
މި ފިޔަވަޅުތައް އެޅުމަށް ހަމަޖެހިފައިވަނީ ބިރުވެރިކަން އުފެދޭގޮތަށް ޒިގްޒެގްކޮށް ދުއްވުމާއި، ސައިލެންސަރު އަޑުގަދަކުރުމާއި، ބާރު ސްޕީޑުގައި ދުއްވުމާއި، ހުއްދަނެތި ރޭސްޖެހުމާއި، މަސްތުގެ ހާލަތުގައި ދުއްވުމުގެ އިތުރުން ފުލުހުން މަޑުކުރަން އެންގުމުން ފިލަން އުޅޭ ފަރާތްތަކަށެވެ. އަދި އުޅަނދު ދުއްވި ފަރާތުގެ އިތުރުން އުޅަނދުގެ ވެރިފަރާތާމެދުވެސް ފިޔަވަޅު އަޅާނެއެވެ.
މީގެއިތުރުން، ނުރައްކާތެރިކޮށް ދުއްވާ އުޅަނދުތައް 30 ދުވަހަށް ފުލުހުންގެ ބެލުމުގެ ދަށަށް ގެންގޮސް، ކަނޑައެޅިފައިވާ މުއްދަތުގައި ހަވާލުނުވާ އުޅަނދުތައް އުސޫލުގެ ދަށުން ނައްތާލެވޭނެއެވެ. އަދި މިފަދަ ކަންކަމުގައި ސަރުކާރާއި ކުންފުނިތަކުގެ މުވައްޒަފުން ޝާމިލުވާނަމަ އިދާރީ ފިޔަވަޅު އެޅުމަށް އެ މުއައްސަސާތަކަށް މައުލޫމާތު ހިއްސާކުރާނެ ކަމަށްވެސް ފުލުހުން ބުންޏެވެ.
