ދިވެހި ވަޠަނީ ޚިދުމަތުގެ ޕްރޮގްރާމްތަކުގެ ތެރެއިން ނޭޝަނަލް ސަރވިސް އިނީޝިއަލް ޓްރެއިނިންގ ފުރިހަމަކުރި ދަރިވަރުންނަށް އަމާޒުކޮށްގެން ކުރިއަށްގެންދިޔަ ފަންނީ ތަމްރީނު ޕްރޮގްރާމުގެ ދެވަނަ ބެޗުގެ 73 ދަރިވަރަކު ތަމްރީނު ފުރިހަމަކޮށް ދަސްވެނިވެއްޖެއެވެ.
ޖޫން 3 އިން ފެށިގެން 16 ހަފްތާގެ މުއްދަތަށް ކުރިއަށްގެންދިޔަ މި ތަމްރީނުތަކުގައި ރާއްޖޭގެ 17 އަތޮޅަކުން ޖުމްލަ 75 ދަރިވަރުން ބައިވެރިވިިއިރު، ކާމިޔާބުކަމާއެކު ކޯސް ނިންމާލީ 60 ފިރިހެން ކުދިންނާއި 13 އަންހެން ކުދިންނެވެ.
ސިފައިންގެ ތަޖުރިބާކާރު އިންސްޓްރަކްޓަރުން ކިޔަވައިދިން މި ތަމްރީނު ފުރިހަމަކުރި ދަރިވަރުންނަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ގަބޫލުކުރާ ލެވެލް 3 ގެ ސެޓިފިކެޓެއް ލިބިގެންދާނެއެވެ. މި ޕްރޮގްރާމްގެ ތެރެއިން އޮޓޯ މޯބައިލް، މެރިން އިންޖިނިއަރިންގ، އިލެކްޓްރީޝަން، އޭސީ މަރާމާތުކުރުން، ވެލްޑިންގ އަދި އޮފީސް މެނޭޖުމަންޓް ފަދަ ސިނާއީ ދާއިރާތަކުން ހުނަރު ދަސްކޮށްދީފައިވާއިރު، މި ތަމްރީނުގެ 3 ވަނަ ބެޗު މި މަހުގެ 12 ވަނަ ދުވަހު ފެށުމަށް ވަނީ ހަމަޖެހިފައެވެ.
