މި އަހަރުގެ މިހާތަނަށް މުދަލު ޒަކާތުގެ ގޮތުގައި ލިބުނު ފައިސާގެ އަދަދު، މިދިޔަ އަހަރު މުޅިއެކު ލިބުނު ޖުމްލަ އަދަދަށްވުރެ އިތުރުވެފައިވާ ކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
ޒަކާތު ހައުސްގެ ހިސާބުތައް ދައްކާ ގޮތުން، މި އަހަރުގެ ޖެނުއަރީ މަހުން ފެށިގެން ނިމިދިޔަ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި 109,262,025.69 ރުފިޔާ ވަނީ ލިބިފައެވެ.
މިއީ މިދިޔަ އަހަރު މުޅިއެކު ލިބުނު 106,456,071.00 ރުފިޔާއަށްވުރެ 2,805,954.69 ރުފިޔާ އިތުރު އަދަދެކެވެ. އެއީ 2.64 އިންސައްތައިގެ ކުރިއެރުމެކެވެ. ޒަކާތު ހައުސްއިން ބުނި ގޮތުގައި، މިދިޔަ މަހުގެ ނިޔަލަށް ދިވެހި ރުފިޔާއިން 108,739,116.62 ރުފިޔާ ލިބިފައިވާއިރު، 34,021.41 އެމެރިކާ ޑޮލަރު ވަނީ ލިބިފައެވެ.
މިދިޔަ އަހަރު މުޅިއެކު ލިބުނު އަދަދަށްވުރެ މިހާތަނަށް ލިބުނު އަދަދު އިތުރުވެފައިވާއިރު، އަހަރުގެ ބާކީ ތިން މަސްދުވަސް ތެރޭގައި މުދަލު ޒަކާތުގެ ގޮތުގައި ލިބޭ ފައިސާގެ އަދަދު އަދިވެސް އިތުރުވާނެ ކަމަށް މޯލްޑިވްސް ޒަކާތު ހައުސްއިން ވަނީ ބުނެފައެވެ.
