އަންނަ 2027 ވަނަ އަހަރުގެ ދިރާސީ އައު އަހަރުގެ ކިޔެވުން ފެށޭނީ ޖަނަވަރީ މަހުގެ 17 ވަނަ ދުވަހު ކަމަށް އެޑިއުކޭޝަން މިނިސްޓްރީން އާންމުކޮށްފައިވާ އެކެޑަމިކް ކަލަންޑަރުން ދައްކައިފިއެވެ. ކަލަންޑަރުގައިވާ ގޮތުން ދިރާސީ އަހަރަށް ޓީޗަރުން ސްކޫލްތަކަށް ރިޕޯޓުކުރަންޖެހެނީ ޖަނަވަރީ 13 ވަނަ ދުވަހުއެވެ.
އެކެޑަމިކް ކަލަންޑަރުން ދައްކާގޮތުން ފުރަތަމަ ޓާމުގެ ތެރޭގައި ސަރުކާރު ބަންދު ގިނަ ދުވަސްތަކެއް ހިމެނެއެވެ. އެގޮތުން ފެބުރުވަރީ 8 ވަނަ ދުވަހަކީ ރޯދަމަހުގެ 1 ވަނަ ދުވަސް ކަމަށްވާތީ ބަންދު ދުވަހެއްގެ ގޮތުގައި ކަނޑައަޅާފައިވާއިރު، ފެބުރުވަރީ 21 އިން 25 އަށް ކަނޑައަޅާފައިވަނީ ޓީޗަރުންގެ ޕްރޮފެޝަނަލް ޑިވެލޮޕްމެންޓް (ޕީޑީ) ދުވަސްތަކުގެ ގޮތުގައެވެ. އަދި ރޯދަމަހުގެ ފަހު 10 އާ ގުޅިގެން ފެބުރުވަރީ 26 އިން މާޗު 7 އަށް ސަރުކާރު ބަންދުވާނެއެވެ. މީގެއިތުރުން މާޗު 9 އިން 11 އަށް ފިތުރު އީދު ބަންދުގެ ގޮތުގައި އަދި މެއި 16 އިން 20 އަށް ޙައްޖާއި އަލްޙާ އީދު ބަންދުގެ ގޮތުގައި ވަނީ ހަމަޖައްސާފައެވެ.
ފުރަތަމަ ޓާމުގެ ޓެސްޓުތައް ޖޫން 29 އިން ޖުލައި 8 އަށް ކުރިއަށްދާއިރު، ދެވަނަ ޓާމުގެ ކިޔެވުން ފެށޭނީ އޮގަސްޓު 1 ގައެވެ. ދެވަނަ ޓާމުގެ ޓެސްޓުތައް ނޮވެމްބަރު 23 އިން ޑިސެމްބަރު 2 އަށް ކުރިއަށްދާއިރު، ޑިސެމްބަރު 5 ގައި ރިޕޯޓު ފޮތް ދިނުމަށްފަހު، ދިރާސީ އަހަރުގެ ކިޔެވުން ނިންމައި ދަރިވަރުން ޗުއްޓީއަށް ދާނީ ޑިސެމްބަރު 10 ގައެވެ. މިހާރު ހިނގަމުންދާ ދިރާސީ އަހަރުގެ ދެވަނަ ޓާމުގެ ކިޔެވުން ނިމި ދަރިވަރުންނަށް ޗުއްޓީ ލިބޭނީ ޑިސެމްބަރު 18 އިން ފެށިގެންނެވެ.
