އާންމު ތަންތަނާއި މަގުމަތީގައި އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކޮށް، އިޖުތިމާއީ އަދި އަހުލާގީ މިންގަނޑުތައް ހިފެހެއްޓުމަށް ދިވެހިރާއްޖޭގައި ދިރިއުޅޭ ބިދޭސީންނަށާއި ފަތުރުވެރިންނަށް ފުލުހުން އިލްތިމާސްކޮށްފިއެވެ.
ފުލުހުން ނެރުނު ނޫސްބަޔާނެއްގައި ބުނީ، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމަތީގައާއި އާންމު ތަންތަނުގައި އުޅޭކަން ފާހަގަކުރެވިފައިވާ ކަމަށެވެ.
ފުލުހުން ފާހަގަކުރި ގޮތުގައި، މިފަދަ އަމަލުތަކަކީ މުޖުތަމައުގެ އާންމު ސުލޫކާއި އަހުލާގީ މިންގަނޑުތަކާ ހިލާފު ކަންކަމެވެ. އަދި އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެތީ، އެފަދަ ކަންކަން ހުއްޓުވުމަށް އެޅެން ހުރި ފިޔަވަޅުތައް އަޅާނެ ކަމަށް ވަނީ ބުނެފައެވެ. މީގެ އިތުރުން، ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް މައުލޫމާތުދީ ހޭލުންތެރިކުރުވުމަށްވެސް ފުލުހުން ވަނީ އެދިފައެވެ.
މީގެ އިތުރުން، ފަތުރުވެރިންނަށް ޚާއްސަކޮށް ކަނޑައެޅިފައިވާ ސަރަހައްދުތައް ފިޔަވައި، އާންމު ތަންތަނާއި މަގުތަކުގައި އުޅޭއިރު ދިވެހި މުޖުތަމައުގެ ސަގާފަތަށް އިހުތިރާމުކޮށް، އެކަށީގެންވާ ގޮތަކަށް ހެދުން އެޅުމަށް ފަތުރުވެރިންނަށް ޚިދުމަތްދޭ ފަރާތްތަކުން ސަމާލުކަން ދިނުމަށް ފުލުހުން ވަނީ ހަނދާންކޮށްދީފައެވެ. އަދި މިކަންކަމާ ހިލާފަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށްވެސް ފުލުހުންގެ ބަޔާނުގައި ވަނީ އިންޒާރުދީފައެވެ.
