ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ 4,000 ހައުސިންގ ޔުނިޓުގެ ތެރެއިން، ހުއްދަނެތި ފްލެޓު ކުއްޔަށް ދިނުމާ ގުޅޭ 16 މައްސަލައެއް ބަލަމުންދާ ކަމަށް އެ ކުންފުނިން ހާމަކޮށްފިއެވެ.
އެފްޑީސީން މައުލޫމާތު ދޭ ގޮތުގައި، މިދިޔަ މަހުގެ 21 ވަނަ ދުވަހާ ހަމައަށް އެ ފްލެޓުތަކާ ގުޅޭ ޖުމްލަ 49 މައްސަލައެއް ހުށަހެޅިފައިވާއިރު، އޭގެ ތެރެއިން އެންމެ ގިނައީ ހުއްދަނެތި އެޕާޓްމަންޓްތަކަށް ބަދަލު ގެނައުމުގެ މައްސަލަތަކެވެ (28 މައްސަލަ).
ހުއްދަނެތި ކުއްޔަށް ދިން މައްސަލަތަކުގެ ތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށް 2 ފަރާތަކަށް ނޯޓިސް ފޮނުވާފައިވާއިރު، ބާކީ 9 މައްސަލައެއް ބެލުމުގެ މަސައްކަތް ދަނީ ކުރިއަށެވެ. މީގެއިތުރުން، ގަވާއިދާ ޚިލާފަށް ކުނިއެޅުމާއި އަޑުގަދަކުރުން ފަދަ ޝަކުވާތަކަށް ވެސް ފިޔަވަޅު އަޅަމުންދާކަން ފާހަގަކުރައްވައި އެފްޑީސީން ބުނީ، އެ ފްލެޓުތަކުގެ ތެރެއިން 3,362 ޔުނިޓުން ގަވާއިދުން މަހުން މަހަށް ކުލި ދައްކަމުންދާއިރު، ގަވާއިދުން ކުލި ނުދައްކާ 564 ޔުނިޓު އެބަހުރި ކަމަށެވެ.
