އަރިއަތޮޅު ދެކުނުބުރީ ކުނބުރުދޫގައި އަލަށް ގާއިމްކުރި ޕޮލިސް ސްޓޭޝަން ރަސްމީކޮށް ހުޅުވައިފިއެވެ.
އެ ރަށުގައި ބޭއްވި ޚާއްޞަ ރަސްމިއްޔާތެއްގައި މި ޕޮލިސް ސްޓޭޝަން ހުޅުއްވައިދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން އާއި ކޮމިޝަނަރ އޮފް ޕޮލިސް އަޙްމަދު މުޙައްމަދުއެވެ. މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީގެ އިތުރުން ކުނބުރުދޫ ކައުންސިލްގެ ރައީސާއި ފުލުހުންގެ ސީނިއަރ އޮފިސަރުންނާއި އެ ރަށުގެ މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.
ކުނބުރުދޫގައި ހުޅުވުނު މި ޕޮލިސް ސްޓޭޝަނަކީ އަތޮޅުތަކުގައި ފުލުހުންގެ ޚިދުމަތް އިތުރު ހަރުފަތަކަށް ގެންގޮސް، ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމަށް ދައުލަތުގެ ބަޖެޓުން ހަރަދުކޮށްގެން ރާއްޖޭގެ އެކި ކަންކޮޅުތަކުގައި 154 މަރުކަޒު ގާއިމުކުރުމަށް ކުރިއަށްގެންދާ ބޮޑު މަޝްރޫއުގެ ދަށުން ހުޅުވުނު ތަނެކެވެ. ރަށްރަށުގެ އަމަންއަމާންކަމާއި ސުލްހަމަސަލަސްކަން ގާއިމުކުރުމަށްޓަކައި، ފުލުހުންގެ އިމާރާތްތަކުގެ މަސައްކަތް ނިންމައި ޒަމާނީ ފަހުގެ ވަސީލަތްތަކާއެކު ޚިދުމަތްތައް ބައްޓަންކުރުމަށް ސަރުކާރުން އިސްކަންދޭކަން ފުލުހުން ވަނީ ފާހަގަކޮށްފައެވެ.
