ނިމިދިޔަ ސެޕްޓެންބަރު މަހު އެކަނިވެސް ދިވެހި ފުލުހުންގެ ޚިދުމަތަށް ޖުމްލަ 924 މައްސަލައެއް ހުށަހަޅާފައިވާކަމަށް އެ އިދާރާގެ ތަފާސްހިސާބުތަކުން ދައްކައިފިއެވެ. ފުލުހުން އާންމުކުރި ތަފާސްހިސާބުތަކަށް ބަލާއިރު، ސެޕްޓެންބަރު މަހު ހުށަހެޅުނު މައްސަލަތަކުގެ އެންމެ ބޮޑު އިންސައްތައެއް ހިއްސާކުރަނީ ވައްކަމުގެ މައްސަލަތަކެވެ. އެގޮތުން ވައްކަމުގެ 277 މައްސަލައެއް ރިޕޯޓުކޮށްފައިވާއިރު، ދެވަނައަށް އެންމެ ގިނައީ މަގުމަތީގެ އެކްސިޑެންޓުތަކުގެ މައްސަލަތަކެވެ. އެއީ 222 މައްސަލައެވެ.
މީގެ އިތުރުން ސެޕްޓެންބަރު މަހުގެ ތެރޭގައި މަސްތުވާތަކެތީގެ 165 މައްސަލައަކާއި، ގެއްލުނު މުދަލުގެ 69 މައްސަލައެއްގެ އިތުރުން ތަކެއްޗަށް ގެއްލުންދިނުމުގެ 57 މައްސަލައަކާއި މާރާމާރީގެ 49 މައްސަލައެއް ވަނީ ހުށަހެޅިފައެވެ. އަދި ޚިޔާނާތުގެ 30 މައްސަލައާއި، ގެވެށި އަނިޔާގެ 23 މައްސަލައިގެ އިތުރުން ޖިންސީ ކުށްތަކުގެ 14 މައްސަލައަކާއި، މަކަރާއި ޙީލަތް އަދި ފޭރުމުގެ 9 މައްސަލަ ވަނީ ރިޕޯޓުކޮށްފައެވެ.
މިއަހަރުގެ ފުރަތަމަ ހަތަރު މަސްދުވަހު މަހަކު އެވްރެޖުކޮށް 1,000 އަށްވުރެ ގިނަ މައްސަލަ ހުށަހެޅުނު ނަމަވެސް، އަހަރުގެ މެދުތެރެއިން ފެށިގެން އާންމު ކުށްތަކުގެ އަދަދު ވަނީ ވަކިވަރަކަށް ކޮންޓްރޯލް ކުރެވިފައެވެ. މިއަހަރުގެ މިހާތަނަށް މުޅި ޖުމުލަ 9,454 މައްސަލަ ފުލުހުންނަށް ހުށަހަޅާފައިވާއިރު، މިދިޔަ އަހަރުގެ ސެޕްޓެންބަރު މަހާ އަޅާބަލާއިރު މިއަހަރުގެ ސެޕްޓެންބަރު މަހު ވައްކަމާއި މަސްތުވާތަކެތީގެ މައްސަލަތައް ވަނީ ދަށްވެފައެވެ. ފުލުހުން ދަނީ މަގުމަތީގެ ރައްކާތެރިކަން އިތުރުކުރުމަށާއި ކުށްތައް މަދުކުރުމަށް ޚާއްޞަ ފިޔަވަޅުތަކެއް އަޅަމުންނެވެ.
