ސަރުކާރުން ކުރިއަށްގެންދާ ދިވެހި ވަޠަނީ ޚިދުމަތުގެ ޕްރޮގްރާމުގެ ދަށުން ތަމްރީނު ފުރިހަމަކޮށްފައިވާ ޒުވާނުންގެ ތެރެއިން 400 އެއްހާ ޒުވާނުންނަށް ވަޒީފާގެ ފުރުސަތުތައް ހަމަޖެހިފައިވާކަމަށް ދިފާޢީ އަދި ވަޠަނީ ޚިދުމަތާ ބެހޭ ވުޒާރާއިން ހާމަކުރައްވައިފިއެވެ. ރައީސުލްޖުމްހޫރިއްޔާގެ އިސްނެންގެވުމަށް ކުރިއަށްގެންދާ މި ޕްރޮގްރާމަކީ ޤައުމާއި ދީންދެކެ ލޯބިވާ، އަދި އަމިއްލަ ނަފްސަށް އިތުބާރުކުރާ އަޚްލާޤު ރަނގަޅު ޖީލެއް ބިނާކުރުމުގެ މަޤުޞަދުގައި ފަށާފައިވާ ޕްރޮގްރާމެކެވެ.
ޓީވީއެމްގެ "ހެނދުނު ހެނދުނާ" ޕްރޮގްރާމުގައި ވާހަކަދައްކަވަމުން ދިފާޢީ އަދި ވަޠަނީ ޚިދުމަތާ ބެހޭ ވަޒީރުގެ ނައިބު ފާތިމަތު މިޒުނާ ވިދާޅުވީ، ވަޠަނީ ޚިދުމަތުގެ ޕްރޮގްރާމް ނިންމި ބައިވެރިންގެ ތެރެއިން 543 ޒުވާނަކު ވަޒީފާއަށް އެދިފައިވާ ކަމަށެވެ. އަދި އޭގެ ތެރެއިން 400 އެއްހާ ކުދިންނަށް މިހާރު ވަޒީފާ ހަމަޖެހިފައިވާއިރު، ބާކީ ތިބި ކުދިންނަށްވެސް އެކުދިން ބޭނުންވާ ދާއިރާތަކުން ކެރިއަރ ގައިޑެންސް ދީގެން ވަޒީފާގެ ފުރުސަތުތައް ފަހިކޮށްދިނުމުގެ މަސައްކަތް ދަނީ ކުރަމުންނެވެ.
މިޒުނާ އިތުރަށް ފާހަގަކުރެއްވި ގޮތުގައި، މި ޕްރޮގްރާމުގެ ތެރެއިން ޒުވާނުންނަށް ދީނީ ކަންކަމަށް އަހުލުވެރިކުރުވުމާއި، މަސައްކަތުގެ މާހައުލަށް ބޭނުންވާ ފަންނީ ހުނަރުތަކާއި، ނަފްސާނީ އަދި ޖިސްމާނީ ދުޅަހެޔޮކަން ދަސްކޮށްދެވެއެވެ. އަދި ތަމްރީނު ނިންމާފައިވާ 18 އަހަރު ނުފުރޭ ކުދިންނަށް ޚާއްސަކޮށްގެން އިންޓާންޝިޕް ޕްރޮގްރާމެއް ފެށުމަށް ހަމަޖެހިފައިވާކަމަށްވެސް އެ ވުޒާރާއިން ވަނީ ބުނެފައެވެ. މީގެ އިތުރުން، ގިރިފުށި ތަރައްޤީކޮށް އެތަނުގައި ނެޝެނަލް ސަރވިސް ސެންޓަރެއް ޤާއިމުކުރުމުގެ މަސައްކަތްވެސް ކުރިއަށްދާކަން ވަނީ ހާމަކޮށްފައެވެ.
