ނަގުދު ފައިސާއަށް ބަރޯސާވާ މިންވަރު ކުޑަކޮށް "ޑިޖިޓަލް-ފަސްޓް" ބޭންކިންގ ޚިދުމަތްތައް ފުޅާކުރުމުގެ ސިޔާސަތުގެ ދަށުން، އޭޓީއެމްތަކުން މަހެއްގެ މައްޗަށް ނެގޭނެ އެންމެ ގިނަ އަދަދަކީ 3,500 ޑޮލަރު ކަމަށް ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސައިފިއެވެ.
މިހިނގާ އޮކްޓޯބަރު މަހުގެ 1 ވަނަ ދުވަހުން ފެށިގެން އަމަލުކުރަން ފެށި މި ބަދަލާއެކު މަހެއްގެ މައްޗަށް ލިމިޓެއް ކަނޑައެޅި ނަމަވެސް، ކާޑަކުން ދުވާލަކަށް ނެގޭ 1,600 ޑޮލަރުގެ ލިމިޓަށް އެއްވެސް ބަދަލެއް ނާންނާނެ ކަމަށް ބީއެމްއެލްއިން މައުލޫމާތު ދެއެވެ.
ބީއެމްއެލްއިން ހާމަކުރި ގޮތުގައި މިއީ ނަގުދު ފައިސާ ބޭނުންކުރުން މަދުކޮށް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ގާއިމުކުރުމަށް އެ ބޭންކުން ކުރަމުންދާ ދުރުރާސްތާގެ އިންވެސްޓްމަންޓްތަކުގެ ތެރެއިން ނިންމި ނިންމުމެކެވެ. އެގޮތުން، މޮބައިލް ބޭންކިންގ އަދި އިންޓަރނެޓް ބޭންކިންގ މެދުވެރިކޮށް ބިލުތަކަށް ފައިސާ ދެއްކުމާއި، ވަގުތުން ފައިސާ ޓްރާންސްފަރ ކުރުމުގެ އިތުރުން އެކައުންޓު ހުޅުވުމާއި އެހެނިހެން ޚިދުމަތްތަކަށް އޮންލައިންކޮށް އެދެވޭނެ އިންތިޒާމުތައް ވަނީ ފަހިކޮށްދެވިފައެވެ.
