ޖިންސީ ފުރައްސާރައިގެ ތުހުމަތުތަކަކާ ގުޅިގެން މީހަކު ހޯދުމަށް ފުލުހުން އާންމުންގެ އެހީތެރިކަމަށް އެދުނު މީހާ މިހާރު ދެނެގަނެވިފައިވާ ކަމަށް މޯލްޑިވްސް ޕޮލިސް ސާވިސްއިން ހާމަކޮށްފިއެވެ. މިއީ ފުލުހުންގެ ފެމެލީ އެންޑް ޗައިލް ޕްރޮޓެކްޝަން (އެފްސީޕީ) ޔުނިޓުން ބަލަމުންދާ މައްސަލައަކާ ގުޅިގެން ހޯދަމުންދިޔަ މީހެކެވެ.
އެ މީހާ ހޯދުމަށްޓަކައި ފުލުހުން ވަނީ މިއަދުގެ މެންދުރުގެ ވަގުތެއްގައި އޭނާގެ ސީސީޓީވީ ވީޑިއޯއެއް އާންމުކޮށްފައެވެ. އާންމުކުރި ވީޑިއޯއިން ފެންނަ ގޮތުގައި ހުދު ކުލައިގެ އަތްކުރު ގަމީހަކާއި މަޑު ނޫކުލައިގެ ޖިންސެއް ލައިގެން ހުރި އެ މީހާ ވަނީ މާލޭގެ ގެއެއްގެ ކުރިމަތީގައި ހަރަކާތްތެރިވެފައެވެ.
ފުލުހުން ދެންމެ ކުރި އިއުލާނެއްގައި ބުނެފައިވަނީ، އާންމުންގެ އެހީތެރިކަމާއެކު އެ މީހާއަކީ ކާކުކަން މިހާރު ދެނެގަނެވިފައިވާ ކަމަށެވެ. އަދި ތަހުގީގަށް ބޭނުންވާ މައުލޫމާތު ހޯދުމުގައި އާންމު ރައްޔިތުންގެ ފަރާތުން ލިބުނު ފުރިހަމަ އެއްބާރުލުމަށް ފުލުހުން ވަނީ ޝުކުރު އަދާކޮށްފައެވެ.
