މާލޭ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަޝްރޫއުގެ ދަށުން އެތެރޭގެ އޮޕަރޭޝަންތަކަށް ތަރައްގީކުރާ ސަރަހައްދު އަންނަ އޮކްޓޯބަރު މަހުގެ ކުރީކޮޅު ނިންމައިލެވޭނެ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ
މިނިސްޓަރު "އެކްސް" ގައި އާންމުކުރެއްވި ވީޑިއޯއާއެކު ފާހަގަކުރެއްވި ގޮތުގައި، ތިލަފުށީގައި ތަރައްގީކުރާ އާ ބަނދަރާއެކު މާލޭ ބަނދަރަށް ދިމާވެފައިވާ ތޮއްޖެހުމާއި ޖާގައިގެ ދަތިކަމަށް ދާއިމީ ހައްލެއް ލިބިގެންދާނެއެވެ.
އެމްޕީއެލުން މައުލޫމާތު ދޭ ގޮތުގައި، ތިލަފުށީ ބަނދަރުގެ އެތެރޭގެ އޮޕަރޭޝަންތަކަށް ޚާއްސަ ސަރަހައްދުގެ މަސައްކަތް އަންނަ އޮކްޓޯބަރު މަހުގެ ކުރީކޮޅު ނިމޭނެއެވެ. މިއާއެކު ދޯންޏާއި ކާގޯ ކްލިއަރެންސްގެ އޮޕަރޭޝަންތައް ތިލަފުށްޓަށް ބަދަލުކުރެވޭނެއެވެ. މީގެއިތުރުން، ސީއެޗްއީސީން ކުރިއަށްގެންދާ ބޭރުގެ އޮޕަރޭޝަންތަކަށް ތަރައްގީކުރާ ސަރަހައްދުގެ ޑޮމެސްޓިކް ކީގެ މަސައްކަތް ނޮވެމްބަރުގެ ނިޔަލަށް އަދި އިންޓަނޭޝަނަލް ކީގެ މަސައްކަތް އަންނަ ޖުލައި މަހަށް ނިންމާލުމަށް ވަނީ އަމާޒުހިފާފައެވެ.
ގާތްގަނޑަކަށް 250 މިލިއަން ޑޮލަރުގެ މި މަޝްރޫއު ފުރިހަމަވުމުން، އަހަރަކު 300,000 ކޮންޓެއިނަރު ހެންޑްލްކުރުމުގެ ގާބިލުކަން ލިބި، މުދާ ކްލިއާ ކުރުމަށް ނަގާ މުއްދަތު 48 ގަޑިއިރަށް ކުޑަކުރެވިގެންދާނެއެވެ.
