ރާއްޖޭގައި ޕޯސްޓްމޯޓަމް ހަދާ ޔުނިޓެއް ގާއިމުކުރުމަށްޓަކައި ހުޅުމާލެ ސަހަރާ ކައިރިން އައިޖީއެމްއެޗަށް ބިން ހަމަޖައްސައި، ކުރިއަށް އޮތް ދެ މަހެއްހާ ދުވަހުގެ ތެރޭގައި އެ ޔުނިޓުގެ އަމަލީ މަސައްކަތް ފެށޭނެ ކަމަށް އައިޖީއެމްއެޗުން ބުނެފިއެވެ.
މިހާރު ކުރިއަށް ދަނީ އެ ޔުނިޓުގެ ކޮންސެޕްޓު އަދި ޑީޓެއިލްޑް ކުރެހުންތައް ނިންމުމާއި މަސައްކަތް ހަވާލުކުރާނެ ބަޔަކު ހޯދުމުގެ މަސައްކަތްތަކެވެ.
މިހާރު ރާއްޖެއިން ބޭރަށް ހަށިގަނޑު ފޮނުވައިގެން ޕޯސްޓްމޯޓަމް ހެދުމަށް ބޮޑު ހޭދައެއް ކުރަންޖެހޭއިރު، މި ޔުނިޓު ގާއިމުވުމުން މުޅި ރާއްޖެއަށް ކްލިނިކަލް ފޮރެންސިކް އަދި ޕޯސްޓްމޯޓަމްގެ ޚިދުމަތްތައް ހަރުދަނާ ނިޒާމެއްގެ ދަށުން ލިބިގެންދާނެއެވެ. މި ޔުނިޓުން މަރުވި ސަބަބު ދެނެގަތުމުގެ ތަހުލީލުތަކުގެ އިތުރުން، ޖިންސީ އަދި ޖިސްމާނީ ގޯނާއާއި އަނިޔާތަކާ ގުޅޭ ޝަރުއީ އަދި އިންޝުއަރެންސް ބޭނުންތަކަށް ބޭނުންވާ ތަހުލީލުތައް ފޯރުކޮށްދިނުމަށް ވަނީ ހަމަޖެހިފައެވެ.
