މަގު ކޮނުމުގެ އެކި މަސައްކަތްތަކުގެ ތެރެއިން ކަރަންޓު ކޭބަލްތަކަށް ގެއްލުންވެ ކަރަންޓު ކެނޑޭ މައްސަލަ ހައްލުކުރުމަށްޓަކައި، އިހުމާލުވާ ފަރާތްތައް ޒިންމާދާރުކުރުވައި، މައްސަލަ ހައްލުކުރަން ހިނގާ މުޅި ޚަރަދު އެ ފަރާތެއްގެ އަތުން ނެގުމަށް ސްޓެލްކޯއިން ނިންމައިފިއެވެ. ސްޓެލްކޯއިން މިގޮތަށް ނިންމީ ހުޅުމާލޭގައި އިމާރާތްކުރުމުގެ މަސައްކަތް ކުރާ މީހުން މަގު ކޮނުމުގެ ތެރޭގައި ކޭބަލްތަކަށް ގެއްލުންވެ، ދެ ހަފުތާ ތެރޭ ދެ ފަހަރަށް ކަރަންޓު ކެނޑުމުގެ ހާދިސާތައް ހިނގުމާ ގުޅިގެންނެވެ.
އެ ކުންފުނިން ބުނި ގޮތުގައި މިއީ ކަރަންޓު މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތިތަކުން ސަލާމަތްކޮށް، ދެމެހެއްޓެނިވި ގޮތެއްގައި ޚިދުމަތް ފޯރުކޮށްދިނުމަށް އެޅި ފިޔަވަޅެކެވެ. އެހެންކަމުން، މަގު ކޮނުމުގެ މަސައްކަތްތައް ކުރާ ހުރިހާ ފަރާތްތަކުންވެސް ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
