ރާއްޖޭގައި ބަންދުކޮށްފައި ހުރި މިޞްރުގެ ޑޮކްޓަރެއް ކަމަށްވާ ޕީޓާ ސަމާން މަރްޒޫކް މިނިވަންކޮށް، އަނބުރާ އެ ޤައުމަށް ފޮނުވާލާފައިވާކަމަށް މިސްރުގެ މީޑިއާތަކުން ރިޕޯޓްކޮށްފިއެވެ.
މިސްރުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ އޭނާ މިނިވަންކޮށް ކޮންސިއުލަ އެހީތެރިކަން ފޯރުކޮށްދިނުމަށް ދިވެހި ސަރުކާރުގެ ކަމާބެހޭ އިދާރާތަކާއެކު ގިނަ މަޝްވަރާތަކެއް ކުރެވުނު ކަމަށެވެ.
މި މައްސަލައިގައި މިޞްރުގެ ފޮރިން މިނިސްޓްރީގެ އިސް ބޭފުޅުން ރާއްޖޭގެ ފޮރިން މިނިސްޓްރީގެ ކޮންސިއުލަ ޑިޕާޓްމަންޓުގެ އިސްވެރިޔާއާ ބައްދަލުކުރައްވައި ކުރެއްވި މަސައްކަތުގެ ނަތީޖާއެއްގެ ގޮތުން، ދިވެހި ސަރުކާރުން ވަނީ އޭނާ މިނިވަންކުރުމަށް އެއްބަސްވެފައެވެ. ޕީޓާ ސަމާން އެނބުރި މިޞްރަށް ދިއުމުން އެ މިނިސްޓްރީން އޭނާއާއި އޭނާގެ އާއިލާއާ ބައްދަލުކޮށްފައިވާއިރު، އޭނާގެ އާއިލާއިން ވަނީ މިކަމުގައި އެހީތެރިވެދިން އިދާރާތަކަށް ޝުކުރު އަދާކޮށްފައެވެ.
ނަމަވެސް އޭނާ ރާއްޖޭގައި ބަންދުކޮށްފައިހުރީ ކިއްވެކަމެއް ރިޕޯޓްކޮށްފައެއް ނުވެއެވެ. ނިމި ދިޔަ ހަފްތާތެރޭ މިސްރުގެ ފަތުރުވެރިއަކު ވެލާނާ އިންޓަނޭޝަނަލް އެއާޕޯޓްގައި "ދަބަހުގައި ބޮމެއް އެބައޮތް" ކަމަށް ބުނެ ސަމާސާކުރުމުން ހައްޔަރުކޮށްފައެވެ. އޭނާ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ކޯޓުން ވަނީ އޭނާ ބަންދުކުރުމަށް އަމުރުކޮށްފައެވެ.
