ވާޖިބު އަދާކުރަމުން ދަނިކޮށް މަރުވާ ފުލުހުންގެ އާއިލާތަކަށް ފުލުހުންގެ ޚިދުމަތުން ބޭސްފަރުވާ ކޮށްދޭންޖެހޭ ގޮތަށް ފުލުހުންގެ ވަޒީފާގެ ގަވައިދު އިސްލާހުކޮށް، ރޭ ގެޒެޓުކޮށްފިއެވެ.
މީގެއިތުރުން، ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ، އެ މުވައްޒަފަކު އަދާކުރި ދައުރާއި ދިމާވި ހާދިސާއަށް ބަލައި އެގްޒެކެޓިވް މެނޭޖްމަންޓު ބޯޑުން ނިންމާ ގޮތެއްގެ މަތިން ޚާއްސަ ރަސްމިއްޔާތެއްގެ ގޮތުގައި ބޭއްވުމުގެ ފުރުސަތުވެސް މި އިސްލާހުގެ ދަށުން ވަނީ ހުޅުވާލާފައެވެ.
މި ގަވައިދަށް އިސްލާހު ގެނެސްފައިވާއިރު، 2019 އިން 2024 އަށް ފުލުހުންނާއި ސިފައިންގެ އިތުރުން އެފަރާތްތަކުގެ އާއިލާތަކުގެ ބޭސްފަރުވާއަށް 1.2 ބިލިއަނަށްވުރެ ގިނަ ރުފިޔާ ހަރަދުވެފައިވާ ކަމަށް އޮޑިޓް ރިޕޯޓަކުން ވަނީ ދައްކާފައެވެ. އަހަރަކު އެވްރެޖްކޮށް ބޭސްފަރުވާގެ ހޭދަ އިތުރުވަމުންދާތީ، ދައުލަތުގެ ހަރަދުތައް ދެމެހެއްޓެނިވި މިންވަރެއްގައި ހިފެހެއްޓުމަށްޓަކައި އެ ސްކީމްތައް މުރާޖައާކޮށް ހަރަދުތައް ކޮންޓްރޯލްކުރުމަށް އޮޑިޓް އޮފީހުން ވަނީ އިލްތިމާސްކޮށްފައެވެ.
