ރާއްޖޭގެ ޗަސްބިންތަކުގައި އުޅޭ ކަކުނި ފަލަކުރުން ނުވަތަ "މަޑް ކްރެބް ފެޓަނިންގް" މަޝްރޫއެއް ހިންގުމުގެ ހުއްދަ ފިޝަރީޒް މިނިސްޓްރީން ފުރަތަމަ ފަހަރަށް ދޫކޮށްފިއެވެ. މެރިޓޯލް ޕްރައިވެޓް ލިމިޓެޑް ނަމަކަށް ކިޔާ އަމިއްލަ ކުންފުންޏަކަށް ދޫކުރި މި ޕައިލެޓް މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ގދ. ފިޔޯރީގައެވެ.
މި މަޝްރޫއުގެ މައިގަނޑު މަގްސަދަކީ ފިޔޯރީގެ "ކުޅިޔެ ވަޅަގަނޑޭ" ކުޅިން ނަގާ ކުދި ކަކުނި، ހާއްސަ ކޮށިތަކެއްގައި ބަލަހައްޓައިގެން ފަލަކޮށް، ވިޔަފާރި އުސޫލުން ބާޒާރަށް ނެރެވޭނެ ފެންވަރަށް ތަރައްގީކުރުމެވެ. ފިޝަރީޒް މިނިސްޓްރީން ބުނީ މީގެ ސަބަބުން ގުދުރަތީ ވަސީލަތްތަކަށް ގެއްލުން ނުވާނެހެން ދެމެހެއްޓެނިވި ގޮތެއްގައި ކަކުނީގެ ވިޔަފާރި ފުޅާކުރުމުގެ ފުރުސަތު ފަހިވެ، ރާއްޖޭގެ މެރިކަލްޗާ ދާއިރާއަށް ބޮޑު ކުރިއެރުމެއް ލިބިގެންދާނެ ކަމަށެވެ.
