ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި، ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ހަރުދަނާކުރުމުގެ މަގުސަދުގައި އެކުލަވައިލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން ސޮއިކޮށްފިއެވެ. ސަރުކާރުގެ ފަރާތުން މި ގަރާރުގައި ސޮއިކުރެއްވީ ހެލްތު މިނިސްޓަރު ޤީލާ ޢަލީއެވެ.
މި ގަރާރަކީ ނޮވެމްބަރު 2024 ގައި ކޮލަމްބިއާގައި ބޭއްވުނު، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގްވާމީ މަހާސިންތާގައި ފާސްކުރި ގަރާރެކެވެ. މި ގަރާރުގެ މައިގަނޑު އަމާޒަކީ އިލްމީ ހޯދުންތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމާއި، ގާނޫނީ އޮނިގަނޑުތައް ހަރުދަނާކުރުމުގެ އިތުރުން ޑިޖިޓަލް މާހައުލުގައި ކުދިންގެ ރައްކާތެރިކަން ކަށަވަރުކުރުމެވެ. މި ރަސްމިއްޔާތުގައި މިނިސްޓަރު ޤީލާ ވިދާޅުވީ ކުޑަކުދިންނަށް ކުރާ އަނިޔާ ހުއްޓުވުމުގައި ދެމެހެއްޓެނިވި ކުރިއެރުމެއް ހޯދޭނީ މުޅި މުޖުތަމައު ގުޅިގެން ކުރާ މަސައްކަތުން ކަމަށެވެ.
