ދިރުވާލައިގެން ރާއްޖެއަށް މަސްތުވާތަކެތި އެތެރެކުރި މައްސަލައެއްގައި ހައްޔަރުކުރި ނޭޕާލުގެ ދެ ރައްޔިތުންގެ ހަށިގަނޑުން 142 ބުލެޓު ފެނިފައިވާ ކަމަށާއި، އެ ތަކެތީގެ ވަގުތީ ބަރުދަނުގައި 1.5 ކިލޯއަށްވުރެ ގިނަ މަސްތުވާތަކެތި ހުރި ކަމަށް ފުލުހުން މިއަދު ބުނެފިއެވެ. މި މައްސަލައިގައި ކަސްޓަމްސްއިން އަތުލައިގަނެ ފުލުހުންނާ ހަވާލުކުރުމުން މިދިޔަ ހުކުރު ދުވަހު ހައްޔަރުކޮށްފައިވަނީ ނޭޕާލަށް ނިސްބަތްވާ 47 އަހަރުގެ ނިއްކަ ތަމަންގް އާއި 40 އަހަރުގެ އީތްރާނީ ގަލެއެވެ.
އެ ދެ މީހުން އިއްޔެ ކްރިމިނަލް ކޯޓަށް ހާޒިރުކުރިއިރު، ކޯޓު އަމުރުތަކުގައި ބަޔާންކޮށްފައިވަނީ އެ ދެ މީހުންގެ ހަށިގަނޑުން ފެނުނީ 650 ގްރާމްގެ ޖުމްލަ 53 ބުލެޓު ކަމަށެވެ. ނަމަވެސް ފުލުހުންގެ ބަލައިފާސްކުރުމުގެ ތެރެއިން އެ މީހުންގެ ހަށިގަނޑުން ނެގުނު ބުލެޓުގެ ޖުމްލަ އަދަދު 142 އަށް އަރާފައިވާ ކަމަށް ފުލުހުން ވަނީ ކަށަވަރުކޮށްދީފައެވެ. އެ މީހުން ކުށް ކުރިކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާތީއާއި މުޖުތަމަޢުގެ ސަލާމަތަށް ނުރައްކާވެދާނެތީ، ކޯޓުން ވަނީ އެ ދެ މީހުންގެ ބަންދަށް 30 ދުވަސް އިތުރުކޮށްދީފައެވެ.
ރާއްޖެއަށް ބިދޭސީން މަސްތުވާތަކެތި އެތެރެކުރުމުގެ މައްސަލަތައް ފަހަކަށް އައިސް އިތުރުވަމުންދާއިރު، މި ފަދަ ކުށްތައް ހުއްޓުވައި ފިޔަވަޅު ވަރުގަދަކުރުމުގެ ގޮތުން، ވަކި މިންވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް ޤާނޫނަށް ވަނީ އިޞްލާޙު ގެނެސްފައެވެ.
