ރަސްމާލޭގައި 20 ބިލިއަން ޑޮލަރުގެ ވޯޓާފްރަންޓާއި މެރީނާއެއް ތަރައްގީކުރުމަށް ޔޫއޭއީގެ އީގަލް ހިލްސް ކުންފުންޏަށް 500 ހެކްޓަރުގެ ބިން ދިނުމުގެ އެއްބަސްވުމާ ގުޅިގެން އިދިކޮޅު އެމްޑީޕީން ދައްކަމުންދާ ވާހަކަތަކަށް ޕީއެންސީގެ ނައިބު ރައީސް އަދި ބާރަށު ދާއިރާގެ މެމްބަރު އިބްރާހިމް ޝުޖާއު ރައްދު ދެއްވައިފިއެވެ.
މި އެއްބަސްވުން ބާތިލުކުރަން ގާނޫނީ ވަކީލު އަލީ ހުސެއިން ސުޕްރީމް ކޯޓަށް މައްސަލައެއް ހުށަހަޅުއްވާފައިވަނިކޮށް، އެކްސްގައި ކުރެއްވި ޕޯސްޓެއްގައި ޝުޖާއު ވިދާޅުވީ، ޤައުމަށް އިޤްތިޞާދީ ކުރިއެރުމެއް ލިބެން އުޅޭ ކޮންމެ ވަގުތަކު އެމްޑީޕީން ހުރަސްއަޅައި "ސަކަރާތް ޖަހަން" ފަށާ ކަމަށެވެ.
މީގެ ކުރިން ފާފު އަތޮޅު ތަރައްޤީކުރުމުގެ ބޮޑު މަޝްރޫޢާ ދެކޮޅަށް އެމްޑީޕީން ހިންގި ޙަރަކާތްތަކަށް އިޝާރާތް ކުރައްވައި ޝުޖާއު ވަނީ ފާފު އަތޮޅަށް ޖެހި ސަކަރާތް މިފަހަރު ޖެހިޔަކަ ނުދޭނެ ކަމަށް ވިދާޅުވެފައެވެ.
އަދި ރައީސް ޑރ. މުޙައްމަދު މުޢިއްޒަކީ ޤައުމުގެ އެއްވެސް ހަރުމުދަލެއް ވިއްކަވާނެ ވެރިއެއް ނޫން ކަމުގެ ޔަޤީންކަން ދެއްވަމުން، ޝުޖާއު ވަނީ އަމިއްލަ ފައިމައްޗަށް ތެދުވެ ފުއްދުންތެރިކަން ހޯދުމަށް ވިސްނުމަށް ދިވެހި ރައްޔިތުންނަށް އިލްތިމާސް ކުރައްވާފައެވެ.
