ދިވެހިރާއްޖޭގައި އިތުރުވަމުންދާ ސްކޭމްގެ މައްސަލަތަކާ ގުޅޭގޮތުން ފާއިތުވި ހަފުތާގެ ތެރޭގައި އެކި ސްކޭމްތަކުގައި ޖުމްލަ 454،767 ރުފިޔާ ގެއްލިފައިވާ ކަމަށް ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން ހާމަކޮށްފިއެވެ.
މި މުއްދަތުގެ ތެރޭގައި ސެންޓަރަށް 36 މައްސަލައެއް ރިޕޯޓްކޮށްފައިވާއިރު، މިއީ އޭގެ ކުރީ ހަފުތާއާ އަޅާބަލާއިރު ރިޕޯޓްކުރި މައްސަލައިގެ އަދަދު މަދު ނަމަވެސް، ގެއްލުނު ފައިސާގެ ޖުމްލަ އަދަދު އިތުރުވެފައިވާ ހަފުތާއެކެވެ. ނަމަވެސް، ކަމާބެހޭ މުވައްސަސާތަކާއި ބޭންކުތައް ގުޅިގެން ކުރި މަސައްކަތުން، އޭގެ ތެރެއިން 218،645 ރުފިޔާ ވަނީ އަނބުރާ ހޯދާދެވިފައެވެ.
ފާއިތުވި ހަފުތާގައި އެންމެ ގިނައިން ރިޕޯޓްކޮށްފައިވަނީ އޮންލައިން ވިޔަފާރިއާއި އީ-ކޮމާސް މެދުވެރިކޮށް ހިންގާފައިވާ އޮޅުވާލުންތަކެވެ. އެގޮތުން:
-
އީ-ކޮމާސް / އޮންލައިން ވިޔަފާރި: 18 މައްސަލަ
-
ބޭރު ފައިސާ މާރުކުރުން: 7 މައްސަލަ
-
ޝަހްސު އޮޅުވާލުން: 4 މައްސަލަ
-
ބުކިންގ ކެންސަލްކޮށް ރިފަންޑް ހޯދުން: 3 މައްސަލަ
-
އެހެނިހެން ސްކޭމްތައް: 2 މައްސަލަ
-
އިންވެސްޓްމަންޓް ސްކޭމް: 1 މައްސަލަ
ފުލުހުން ވިދާޅުވި ގޮތުގައި މިފަދަ ސްކޭމްތައް ހިންގުމަށް ފޭސްބުކް މާކެޓްޕްލޭސް، ވައިބާ، ޓެލެގްރާމް، ވަޓްސްއެޕް، އިންސްޓަގްރާމް، ޓިކްޓޮކް އަދި ފިޝިންގ ލިންކުތަކުގެ އިތުރުން ފޯނު ކޯލްތައް ފަދަ އެކި މަންސަތައް ވަރަށް ބޮޑަށް ބޭނުންކޮށްފައިވެއެވެ.
އޮންލައިންކޮށް ފެންނަ އިޝްތިހާރުތަކާއި ލިބޭ މެސެޖުތަކަކީ ތެދު މައުލޫމާތުތޯ ރަނގަޅަށް ކަށަވަރުކުރުމަށާއި، އަވަސް އަރުވާލައިގެން ފައިސާ ފޮނުވަން ކުރާ ޑިމާންޑްތަކަށް ސަމާލުވުމަށް ފުލުހުން އިލްތިމާސްކުރައްވާފައިވެއެވެ. އަދި އޯޓީޕީ، ޕާސްވޯޑް ނުވަތަ ބޭންކިންގ މައުލޫމާތު އެއްވެސް މީހަކާ ހިއްސާނުކުރުމަށާއި، ޝައްކު އުފެދޭ ކަމެއް ދިމާވެއްޖެނަމަ ލަސްނުކޮށް ކަމާބެހޭ އިދާރާތަކަށް އެންގުމަށް ވަނީ އެދިފައެވެ.
