ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ސިޔާސީ ދަތުރުފުޅެއްގައި އަންނަ ހުކުރު ދުވަހު އައްޑޫ ސިޓީއަށް ވަޑައިގަތުމަށް ހަމަޖެހިއްޖެއެވެ. އެމަނިކުފާނު ހާމަކުރެއްވި ގޮތުގައި، މި ދަތުރުފުޅުގެ ތެރެއިން ހުކުރު ދުވަހުގެ ރޭ އައްޑޫ ސިޓީގައި ޕީޕަލްސް ނޭޝަނަލް ފްރަންޓް (ޕީއެންއެފް) އިން ޚާއްސަ ޓައުންހޯލް ޖަލްސާއެއް ބޭއްވުމަށް ވަނީ ނިންމާފައެވެ.
މިއީ ސިޔާސީ ހަރަކާތްތައް ވަރުގަދަކުރުމުގެ ގޮތުން ރައީސް ޔާމީން އަތޮޅުތަކަށް ކުރައްވަމުންދާ ދަތުރުފުޅުތަކުގެ ތެރެއިން ކުރައްވާ ދަތުރުފުޅެކެވެ. އެގޮތުން މިދިޔަ މަހުގެ ތެރޭގައިވެސް އެމަނިކުފާނު ވަނީ ތިނަދޫ ސިޓީއަށާއި ފުވައްމަލަކު ސިޓީއަށް ވަޑައިގެން ސިޔާސީ ހަރަކާތްތަކެއް ހިންގަވާފައެވެ.
2013 އިން 2018 އަށް ޕީޕީއެމްގެ ޓިކެޓުގައި ރާއްޖޭގެ ރައީސްކަން ކުރެއްވި ޔާމީން ޕީއެންއެފް އުފެއްދެވީ 2023 ވަނަ އަހަރުގެ ފަހުކޮޅުގައެވެ. ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން އިއުލާންކުރައްވާފައިވާ ޔާމީން ގެންދަވަނީ އެ ޕާޓީގެ ހަރަކާތްތައް ފުޅާކޮށް، އާންމުންގެ ތާއީދު ހޯއްދެވުމަށް ގިނަ މަސައްކަތްތަކެއް ކުރައްވަމުންނެވެ.
