ގަވާއިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން މިދިޔަ ހަފުތާގައި އއ. ތޮއްޑޫގައި ކުރިއަށް ގެންދިޔަ އޮޕަރޭޝަންގައި އިމިގްރޭޝަންގެ ބެލުމުގެ ދަށަށް ގެންދިޔަ 107 ބިދޭސީން ޑީޕޯޓްކުރަން ނިންމައިފިއެވެ.
"އަހާ" ފޯރަމްގައި ވާހަކަދައްކަވަމުން ހޯމްލޭންޑް މިނިސްޓަރު އަލީ އިހުސާން ވަނީ އެ އެންމެންވެސް ރާއްޖެއިން ޑީޕޯޓްކުރުމުގެ މަސައްކަތް މިހާރު ކުރަމުންދާކަން ހާމަކުރައްވާފައެވެ.
ތޮއްޑޫގައި ހިންގި އޮޕަރޭޝަންގައި ޖުމްލަ 507 ބިދޭސީއަކު ފާސްކޮށް ބަލާފައިވާއިރު، އިމިގްރޭޝަންގެ ބެލުމުގެ ދަށަށް ގެންދިޔަ މީހުންގެ ތެރޭގައި ބަޔޯމެޓްރިކްސް ދީފައިވާ މީހުންނާއި ބަޔޯމެޓްރިކްސް ނުދީ ތިބި މީހުން ހިމެނެއެވެ. މިނިސްޓަރު އިހުސާން ވިދާޅުވީ، އެ މީހުން ޑީޕޯޓްކުރަން ނިންމީ ވިސާ ފީ ނުދައްކާ ތިބުމުގެ އިތުރުން، ރާއްޖެއަށް ގެނެސްފައިވާ މަސައްކަތް ނޫން އެހެން މަސައްކަތްތަކެއް ކުރަމުން އަންނަކަން ފާހަގަކުރެވިގެން ކަމަށެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ހައްލެއް ހޯދުމަށް 2024 ވަނަ އަހަރުގެ ކުރީކޮޅު ފެށި "ކުރަނގި" އޮޕަރޭޝަންގެ ތެރެއިން މިހާތަނަށް ގިނަ އަދަދެއްގެ ބިދޭސީން އަތުލައިގަނެ، އޭގެ ތެރެއިން ބޮޑު އިންސައްތައެއް ވަނީ ޑީޕޯޓްކޮށްފައެވެ.
