އެމެރިކާގެ ޓެކް ކުންފުނި "ގޫގުލް" އަށް އައްޑޫ ސިޓީން ބޮޑު ބިމެއް ދީފައިވާ ގޮތުގެ ތަފްސީލު ސާފުނުވާ ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
ރަސްމާލޭ މަޝްރޫއުގެ ތެރެއިން ޔޫއޭއީގެ ކުންފުންޏަކަށް ބޮޑު ބިމެއް ދޭން ނިންމި ނިންމުމާ ގުޅުވައި ސޯޝަލް މީޑިއާގައި ކުރެއްވި ޕޯސްޓެއްގައި މޭޔަރު ނިޒާރު ވިދާޅުވީ، ގޫގުލްއިން އައްޑޫ ސިޓީ ހިތަދޫގައި ހަދާ އިންޓަނޭޝަނަލް ސަބްމެރިން ކޭބަލް ލޭންޑިން ސްޓޭޝަނަކާއި ނެޓްވޯކް ފެސިލިޓީއަށް ދޫކުރި 160،000 އަކަފޫޓުގެ ބިން ދިނީ ކުއްޔަށް ކަމެއް ނުވަތަ ހިލޭ ކަމެއް ސަރުކާރުން ސާފުކޮށްދީފައި ނުވާ ކަމަށެވެ.
ދައުލަތުގެ ގިނަ އަދަދެއްގެ ފައިސާ ހަރަދުކޮށްގެން ހިއްކާ ރަސްމާލެއިން ވެސް ހިލޭ ބިން ދެވޭނެ ގާނޫނީ ހައިސިއްޔަތެއް ސަރުކާރަށް ލިބިގެން ނުވާނެ ކަމަށް މޭޔަރު ވިދާޅުވިއެވެ. އަދި ގޫގުލްއަށް ދޫކޮށްފައިވާ ބިމަށް، މިހާރު ކޮންމެ ގޮތަކަށް ޑީލް ހަދާފައި އޮތް ނަމަވެސް ސިޓީ ކައުންސިލުން ކުލި ނަގާނެ ކަމަށާއި އެކަމަށް ތައްޔާރުވެގެން ތިބުމަށް މޭޔަރު ވަނީ ގޫގުލްގެ ވެރިންނަށް ގޮވާލައްވާފައެވެ.
