އާންމުންގެ ސުވާލުތަކަށް މިނިސްޓަރުން ޖަވާބުދެއްވުމަށް ބާއްވާ "އަހާ" ފޯރަމް، އަހަރަކަށްވުރެ ދިގު މެދުކެނޑުމަކަށްފަހު މާދަމާ ރޭ 21:00 ގަ ބޭއްވުމަށް ވަނީ ނިންމާފައެވެ.
ރައީސް އޮފީހާއި ދައުލަތުގެ މީޑިއާ (ޕީއެސްއެމް) ގުޅިގެން ކުރިއަށްގެންދާ މި ފޯރަމްގައި މާދަމާ ރޭ ބައިވެރިވެވަޑައިގަންނަވާނީ ސްޕޯޓްސް މިނިސްޓަރު އަބްދުﷲ ރާފިއު، ހޯމްލޭންޑް މިނިސްޓަރު އަލީ އިހްސާން އަދި ފިޝަރީޒް މިނިސްޓަރު އަހުމަދު ޝިޔާމެވެ.
މި ފޯރަމްގައި ބައިވެރިވެ ސުވާލުކުރަން ބޭނުންވާ ފަރާތްތަކަށް "ޕީއެސްއެމް އެއާ" އެޕް މެދުވެރިކޮށް ނަން ނޯޓުކުރުމާއި ސުވާލު ފޮނުވުމުގެ ފުރުސަތު މިހާރު ވަނީ ހުޅުވާލާފައެވެ.
ކޮންމެ ދެ މަހުން އެއް މަހު ބޭއްވުމުގެ މަގުސަދުގައި "އަހާ" ފޯރަމް އެންމެ ފުރަތަމަ ބާއްވާފައިވަނީ 2024 ޖެނުއަރީ 25 ގައެވެ. އަދި އެންމެ ފަހުން މި ފޯރަމް ބޭއްވީ މިދިޔަ އަހަރުގެ ޖުލައި 14 ވަނަ ދުވަހުއެވެ.
