ރ. މަޑުއްވަރީގައި ބިދޭސީ އަންހެނަކަށް ހަމަލާދީ، އޭނާގެ އަތުން ފައިސާ ފޭރުނު މައްސަލައެއް މޯލްޑިވްސް ޕޮލިސް ސާވިސްއިން ތަހުގީގުކުރަން ފަށައިފިއެވެ.
ފުލުހުން މައުލޫމާތު ދިން ގޮތުގައި، އިއްޔެ ހެނދުނު 06:04 ހާއިރު ހިނގި މި ހާދިސާގައި ބިދޭސީ އަންހެނަކާއި ފިރިހެނަކާ ދެމެދު މާރާމާރީ ހިންގައި، އަންހެން މީހާގެ އަތުން ފައިސާ ފޭރިފައިވާ މައްސަލަ ވަނީ ހުށަހަޅާފައެވެ. މަޑުއްވަރީ ކައުންސިލުން ހާމަކުރި ގޮތުގައި މި މާރާމާރީ ހިންގި ބަންގްލަދޭޝްގެ ފިރިހެން މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މި ހާދިސާގެ ވީޑިއޯއެއް ސޯޝަލް މީޑިއާގައި ދައުރުވަމުންދާއިރު، އެ ވީޑިއޯއިން ބިދޭސީ ފިރިހެން މީހާ އަންހެން މީހާ ބިންމައްޗަށް ވައްޓާލައި އަނގަމަތީ އަތްއަޅައި އަނިޔާކުރާ މަންޒަރާއި، މަގުމައްޗަށް ފައިސާތައް ވަޔަށް ބުރައިގެންގޮސްފައިވާ މަންޒަރު ފެނެއެވެ.
