ސުޕްރީމް ކޯޓަށް ހާއްސަ އައު އިމާރާތެއް އެޅުމަށް މާލެއިން ބިމެއް ހަމަޖައްސައިދީފި

ސުޕްރީމް ކޯޓު ހިންގާނެ އައު އިމާރާތެއް ބިނާކުރުމަށްޓަކައި، މާލޭގެ އެންމެ ޕްރައިމް އެއް ލޮކޭޝަނުން ސަރުކާރުން މި މަހުގެ ތެރޭގައި ބިމެއް ހަމަޖައްސައިދީފިއެވެ.

މިކަން ހާމަކުރެއްވީ ސުޕްރީމް ކޯޓަށް 18 އަހަރު ފުރުން ފާހަގަކުރުމުގެ ގޮތުން ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު އަބްދުލްޣަނީ މުޙައްމަދެވެ.

އުއްތަމަ ފަނޑިޔާރު ވިދާޅުވީ، ރާއްޖޭގެ އެހެން ކޯޓުތަކެކޭ އެއްފަދައިން ސުޕްރީމް ކޯޓަށްވެސް ދިމާވެފައިވާ އެންމެ ބޮޑު ގޮންޖެހުމަކީ ޖާގައިގެ ދަތިކަން ކަމަށެވެ. އެގޮތުން، ޤާނޫނު އަސާސީ ތަސްދީޤުކުރެވުމާއެކު އިންތިޤާލީ ސުޕްރީމް ކޯޓު ފުރަތަމަ ހިންގީ މުލިއާގޭގެ ބައެއްގައި ކަމަށާއި، އޭގެފަހުން ތީމުގޭގެ އިމާރާތަށް ބަދަލުކުރެވުނުކަން އުއްތަމަ ފަނޑިޔާރު ފާހަގަކުރެއްވިއެވެ.

"މުލިއާގެއާއި ތީމުގެއަކީ ކިތަންމެ ހައިބަތު ބޮޑު ތަންތަން ކަމުގައިވިޔަސް، އެއީ ކޯޓު ހިންގުމަށް ފަރުމާކުރެވިފައިވާ ތަންތަނަށް ނުވުމާއެކު، ވަރަށް ބޮޑެތި ހުރަސްތަކާ ކުރިމަތިވޭ. ސަރުކާރުން ހަމަޖައްސަވައިދެއްވި މި ބިމަކީ ސުޕްރީމް ކޯޓުގެ މުސްތަޤުބަލާ މެދު އަޅުގަނޑުމެންގެ ތަޞައްވުރު ރަމްޒުކޮށްދޭ ބިމެއް،" އުއްތަމަ ފަނޑިޔާރު ވިދާޅުވިއެވެ.

އުއްތަމަ ފަނޑިޔާރު އިތުރަށް ވިދާޅުވީ، ސުޕްރީމް ކޯޓުގެ އައު އިމާރާތް ވެގެންދާނީ އެ ކޯޓުގެ ޤާނޫނީ ދައުރު ފުރިހަމައަށް އަދާކުރެވޭނެ، ފަނޑިޔާރުންނާއި މުވައްޒަފުންގެ އިތުރުން ޚިދުމަތް ހޯދާ ފަރާތްތަކަށްވެސް އެކަށީގެންވާ ފަހި މާހައުލެއް ލިބިގެންދާނެ ތަނަކަށް ކަމަށެވެ.

ރައްޔިތުންނަށް އަދުލު އިންސާފު އެކަށީގެންވާ އަވަސްމިނެއްގައި ފޯރުކޮށްދިނުމަކީ މިވަގުތު އޮތް އެންމެ ބޮޑު ޒިންމާ ކަމަށް ފާހަގަކުރައްވައި، އުއްތަމަ ފަނޑިޔާރު ވިދާޅުވީ މުޅި ރާއްޖޭގެ ކޯޓުތަކުގައި އެއް އަހަރަށްވުރެ ދިގުލައިގޮސްފައިވާ މައްސަލަތައް ނުނިމި ހުރި އިދާރީ އަދި ނިޒާމީ ސަބަބުތައް ދެނެގަނެ، އެކަންކަން ޙައްލުކުރުމުގެ މަސައްކަތް ދަނީ ކުރެވެމުންނެވެ.

މާލޭގެ ކޯޓުތަކަށް ދިމާވެފައިވާ ޖާގައިގެ ދަތިކަމަށް ޙައްލު ހޯދައިދިނުމުގެ ގޮތުން ސަރުކާރުން ދަނީ އިތުރު މަޝްރޫޢުތަކެއްވެސް ހިންގަމުންނެވެ:

• މާލޭ ކޯޓު ކޮމްޕްލެކްސް: މާލޭ ކޯޓު ކޮމްޕްލެކްސް އިމާރާތް ކުރުމުގެ މަސައްކަތް މިއަހަރުގެ ޖުލައި މަހު ވަނީ އެމްޓީސީސީއާ ހަވާލުކޮށްފައެވެ. ރައީސުލްޖުމްހޫރިއްޔާ ހާމަކުރައްވާފައިވާ ގޮތުގައި 2028 ވަނަ އަހަރުގެ ޤަޟާއީ އަހަރުގެ މަސައްކަތްތައް އެ އިމާރާތުގައި ފެށޭވަރަށް މަސައްކަތް ނިންމުމަށް ދަނީ މަސައްކަތް ކުރަމުންނެވެ.

• ހުޅުމާލޭގެ ތަރައްޤީ: ހައިކޯޓާއި ސުޕީރިއާ ކޯޓުތައް ހިމެނޭހެން ހުޅުމާލޭގައި ކޯޓު ކޮމްޕްލެކްސްއެއް އެޅުމުގެ މަސައްކަތް އެމްޓީސީސީން ކުރިއަށްދާއިރު، ކްރިމިނަލް ކޯޓާއި ޑްރަގް ކޯޓު ހިންގުމަށްވެސް ހުޅުމާލޭގައި ވަނީ އިމާރާތެއް ތަރައްޤީކޮށްފައެވެ.