ގަން އިންޓަނޭޝަނަލް އެއާޕޯޓް މެދުވެރިކޮށް ރާއްޖެއަށް ތިން ކިލޯއަށްވުރެ ގިނަ މަސްތުވާތަކެތި އެތެރެކުރަން އުޅުނު އިންޑިއާގެ ދެ މީހަކާއި ދިވެހިއަކު ފުލުހުން ހައްޔަރުކޮށްފިއެވެ.
ފުލުހުން ބުނި ގޮތުގައި، އިންޑިއާގެ ދެ މީހުން ހައްޔަރުކުރީ މި މަހުގެ 22 ވަނަ ދުވަހު އިންޑިއާއިން އައިއިރު އެ މީހުންގެ ލަގެޖުގައި މަސްތުވާތަކެތި ފޮރުވައިގެން ގެނެސްފައިވާ ކަމަށް ކަސްޓަމްސްއިން ދިން މައުލޫމާތަކާ ގުޅިގެންނެވެ. އަދި ދިވެހި މީހާ ހައްޔަރުކުރީ ފުލުހުންގެ ހާއްސަ އިދާރާތައް ގުޅިގެން ހިންގި ކޮންޓްރޯލް ޑެލިވަރީ އޮޕަރޭޝަނެއްގައެވެ.
މި މައްސަލައިގައި ހައްޔަރުކޮށްފައިވަނީ އިންޑިއާގެ ވިވެކް އަމްބަން (24އ) އާއި، ޝަހްމިލް ޕަލި ޕަރަމްބަތް (32އ) އަދި ޏ. ފުވައްމުލަކު ޢަބްދުﷲ އިބްރާހީމް (36އ) އެވެ. ކޯޓަށް ހާޒިރުކުރުމުން އިންޑިއާގެ ދެ މީހުން ޝަރީއަތް ނިމެންދެން ބަންދުކުރަން އަމުރުކޮށްފައިވާއިރު، ޢަބްދުﷲ އިބްރާހީމްގެ ބަންދަށް ވަނީ 15 ދުވަސް ދީފައެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
