މިއީ ވަރަށް ހާމަކަން ބޮޑުކޮށް ދުވަސްތައް ގުނަމުންދާ ސަރުކާރެއް ކަމަށާއި، ރައްޔިތުންނާ ގާތުން ހުރިހާ މައުލޫމާތެއް ހިއްސާކުރުމަށް ރައީސް ޑރ. މުހައްމަދު މުއިއްޒު ވަރަށް ބޮޑަށް ބާރުއަޅުއްވާ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ސަލްޓަން ޕާކުގައި ބޭއްވި "އަހާ" ފޯރަމްގައި ވާހަކަދައްކަވަމުން މިނިސްޓަރު ވިދާޅުވީ، ސަރުކާރުންނާއި ވަޒީރުން ކުރައްވާ މަސައްކަތްތަކާއި މެނިފެސްޓޯ ތަންފީޒުވާ މިންވަރު ބެލުމަކީ ރައްޔިތުން ބޭނުންވާނެ ކަމެއް ކަމަށާއި، މި ސަރުކާރުން ކަންކަން ކުރިއަށްގެންދަނީ ރައްޔިތުންނަށް އެނގޭނެހެން ވަރަށް ހާމަކަން ބޮޑު ގޮތެއްގައި ކަމަށެވެ.
މީގެ އިތުރުން، ސަރުކާރުން ހަވާލުވިއިރު މަސްވެރިކަމުގެ ދާއިރާގައި ހަރަކާތްތެރިވާ އަމިއްލަ ކުންފުނިތަކުގެ ހާލަތަށް ބެލުމެއް ނެތި ކުރިން ގެންގުޅުނު ސިޔާސަތުތަކުގެ ސަބަބުން އެ ކުންފުނިތައް ތިބީ ވަރަށް ބޮޑަށް އިނދަޖެހިފައި ކަމަށް ޝިޔާމް ފާހަގަކުރެއްވިއެވެ. ނަމަވެސް އެންމެން ގުޅިގެން ކުރެވުނު މަސައްކަތުން މިހާރު މަސްވެރިކަމުގެ ސިނާއަތު ވަރަށް ބޮޑަށް ރަނގަޅުވެފައިވާ ކަމަށްވެސް މިނިސްޓަރު ވިދާޅުވިއެވެ.
