ކުރިއާ އަޅާބަލާއިރު ރާއްޖޭގައި ގޭންގު ކުށްތައް ވަރަށް ބޮޑަށް މަދުވެފައިވާ ކަމަށާއި، މިދިޔަ ޖޫން މަހުން ފެށިގެން 10 ގޭންގު ލީޑަރެއްގެ މައްސަލަ ފުލުހުން ތަހުގީގު ކުރަމުން އަންނަކަން ހޯމް މިނިސްޓަރު އަލީ އިހުސާން ހާމަކުރައްވައިފިއެވެ.
"އަހާ" ފޯރަމްގައި އާންމުންގެ ސުވާލަކަށް ޖަވާބު ދެއްވަމުން މިނިސްޓަރު ވަނީ ރާއްޖޭގައި ޒަމާންވީ ގޭންގު މައްސަލަތަކުގެ މައްޗަށް އަލިއަޅުއްވާލައްވާފައެވެ.
މިނިސްޓަރު އިހުސާން ވިދާޅުވި ގޮތުގައި 2007 ވަނަ އަހަރުން ފެށިގެން މި ސަރުކާރު ހަވާލުވުމާ ހަމައަށް، ކޮންމެ އަހަރަކު ގޭންގު މާރާމާރީތަކުގައި ދެއަކާއި ފަހަކާ ދެމެދުގެ އަދަދަކަށް ޒުވާނުން ގާތުލުކުރަމުން ދިޔައެވެ. ނަމަވެސް، މި މައްސަލަ ހައްލުކުރުމަށް ސަރުކާރުން ކުރި މަސައްކަތުން، ފާއިތުވި ތިން އަހަރުގެ ތެރޭގައި ގޭންގު މާރާމާރީއެއްގައި އެއްވެސް ދިވެހި ރައްޔިތެއްގެ ފުރާނަ ގެއްލިފައިނުވާކަން މިނިސްޓަރު ފާހަގަކުރެއްވިއެވެ.
ގޭންގުތައް ހުއްޓުވުމަށް ފުލުހުން ހިންގި ޚާއްސަ އޮޕަރޭޝަންތަކުގެ ތަފްސީލު ދެއްވަމުން މިނިސްޓަރު ވިދާޅުވީ، މިހާތަނަށް ގޭންގުތަކާ ގުޅޭ 53 އޮޕަރޭޝަނެއް ހިންގައި 10،450 މީހުން މާލެއާއި އެހެނިހެން ސަރަހައްދުތަކުން ޗެކުކޮށްފައިވާ ކަމަށެވެ. އަދި އޭގެ ތެރެއިން 517 މީހަކު ހައްޔަރުކޮށް، އެ މީހުންނާ ގުޅުންހުރި 670 ސައިކަލެއް ވަނީ ޓޯކޮށްފައެވެ. މީގެ އިތުރުން ކުޑަކުދިން ގޭންގުތަކަށް ވައްދައިގެން ކުށް ކުރުވުމަށް ސޭފް ހައުސްގެ ގޮތުގައި ބޭނުންކުރި 26 ތަނެއް ވަނީ ބަންދުކޮށްފައެވެ.
ގޭންގު ކުށްތަކުގައި އުޅޭ މީހުންނަށް އެ ކުށްތަކުން ދުރުވުމުގެ އިޚުތިޔާރު ދެވިފައިވާކަން ފާހަގަކުރައްވައި މިނިސްޓަރު ވިދާޅުވީ، ގިނަ ކުދިން މިހާރު ގޭންގުތަކާ ދުރުވެ އެކި ވަޒީފާތަކާ ގުޅެމުންދާ ކަމަށެވެ. މީގެ އިތުރުން، ސަރުކާރުން ގެންގުޅޭ ހަރުދަނާ ސިޔާސަތުގެ ސަބަބުން ގޭންގުތަކުގައި އުޅޭ ޒުވާނުން މަދުވެ، ކޯޓަށް ގޮސް ގޭންގުތަކުގެ ގޮތުގައި ކަނޑައަޅާނެ ބަޔަކު ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ކުރިން ވިދާޅުވެފައިވާކަން މިނިސްޓަރު ފާހަގަކުރެއްވިއެވެ.
