ހުޅުމާލެ ފޭސް އެކެއްގައި ހަދާފައިވާ ސިންތެޓިކް ޓްރެކް ހަލާކުވެފައިވާތީ، ބައިނަލްއަގްވާމީ ސްޓޭންޑަޑްގެ އައު ސިންތެޓިކް ޓްރެކެއް އެޅުމުގެ މަސައްކަތް އަންނަ މަހުގެ 1 ވަނަ ދުވަހު ފެށުމަށް ނިންމާފައިވާކަން ކުޅިވަރާ ބެހޭ ވަޒީރު އަބްދުﷲ ރާފިއު ހާމަކުރައްވައިފިއެވެ.
ވަޒީރު ވިދާޅުވީ މިހާރު އޮތް ޓްރެކަކީ ބައިނަލްއަގްވާމީ ފެންވަރުގެ ޓްރެކަކަށް ނުވާތީ، އެތުލީޓުން ހަދާ ރެކޯޑުތައް ވޯލްޑް އެތުލެޓިކްސްއިން ގަބޫލުނުކުރާ ކަމަށާއި، އަދި ޓްރެކް ހަލާކުވުމުގެ ސަބަބުން އެތުލީޓުންނަށް ތަފާތު އަނިޔާތައް ވަމުންދާ ކަމަށެވެ.
މި މައްސަލައަށް ހައްލެއް ހޯދުމުގެ ގޮތުން، މިހާރު އޮތް ޓްރެކްގެ މެޓީރިއަލްއާއި ބޭސް އެއްކޮށް ނަގައި، ވޯލްޑް އެތުލެޓިކްސްއިން ގަބޫލުކުރާ ފެންވަރަށް އަލުން އެޅުމަށް ވަނީ ހަމަޖެހިފައެވެ. އަންނަ ޖަނަވަރީ މަހަށް މި މަސައްކަތް ނިންމާލެވޭނެ ކަމަށް ވަޒީރު ވިދާޅުވިއެވެ. މީގެ އިތުރުން، މާލޭގައި އޮތް ސިންތެޓިކް ޓްރެކްވެސް ބައިނަލްއަގްވާމީ ސްޓޭންޑަޑަށް ބަދަލުކުރުމުގެ މަސައްކަތް ކުރައްވަމުންދާކަން ވަޒީރު ފާހަގަކުރެއްވިއެވެ.
