"އަދަދު" ނޫހުން ތައްޔާރުކުރި "އައިޝާ" ޑޮކިއުމެންޓްރީގެ މައްސަލައިގައި، ރައީސް އޮފީހުގެ ކުރީގެ މުވައްޒަފު އައިޝަތު އީޝާ އަޝްރަފްގެ މައްޗަށް ގަޒްފުކުރުމުގެ ދައުވާ ޕްރޮސިކިއުޓާ ޖެނެރަލް (ޕީޖީ) އޮފީހުން މިއަދު ކޯޓަށް ހުށަހަޅައިފިއެވެ.
މިދިޔަ މާޗު މަހު ނެރުނު މި ޑޮކިއުމެންޓްރީއާ ގުޅިގެން ފުލުހުން ވަނީ "އަދަދު" ނޫހުގެ އިދާރާ ފާސްކޮށް، އެތަނުގެ ކޮމްޕިއުޓަރު ސާމާނުތައް ހިފަހައްޓާފައެވެ. މީގެއިތުރުން، އެ ނޫހުގެ ސީއީއޯ ހުސެއިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށްވެސް ގަޒްފުކުރުމުގެ ދައުވާ އުފުލައި، އެ ދެ ބޭފުޅުންގެ ޕާސްޕޯޓު ތިން މަސް ދުވަހުގެ މުއްދަތަށް ހިފެހެއްޓިއެވެ. އަދި މި ޑޮކިއުމެންޓްރީގައިވާ އެއްވެސް ވާހަކައެއް އާންމުކުރުން މަނާކޮށް ކްރިމިނަލް ކޯޓުން ވަނީ އަމުރެއްވެސް ނެރެފައެވެ.
މި މައްސަލައިގައި ފުލުހުންގެ ތަހުގީގަށް އީޝާ ހާޒިރުކޮށްފައިވީ ނަމަވެސް، ޑޮކިއުމެންޓްރީގެ މައްސަލައިގައި ދިފާއުގައި އެއްވެސް ވާހަކައެއް ދެއްކުމުގެ ފުރުސަތު އޭނާއަށް ދީފައިނުވާ ކަމަށް އީޝާގެ ވަކީލުން ވަނީ ހާމަކުރައްވާފައެވެ.
