ސްކޭމްތަކުގައި ގެއްލޭ ފައިސާ އަނބުރާ ހޯދުމުގައި ރާއްޖެއިން ދުނިޔޭގެ ނިސްބަތުގައި ފާހަގަކޮށްލެވޭ ފަދަ ބޮޑު ކުރިއެރުމެއް ހޯދާފައިވާ ކަމަށް ފުލުހުން ބުނެފިއެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓަރ އޮފް ޕޮލިސް އާދަމް ނަވީދް ވިދާޅުވީ، މިއަހަރުގެ މިހާތަނަށް ސްކޭމްގެ 1,584 މައްސަލައެއް ހުށަހަޅާފައިވާއިރު، 1,580 ރައްޔިތުން މީގެ ޝިކާރައަކަށް ވެފައިވާ ކަމަށެވެ.
މި ސްކޭމްތަކުގައި ޖުމްލަ 15,067,763.83 (ފަނަރަ މިލިއަން ފަންސާސް ހަތްހާސް ހަތްސަތޭކަ ފަސްދޮޅަސް ތިން ރުފިޔާ އަށްޑިހަ ތިން ލާރި) ގެއްލިފައިވާއިރު، އޭގެ ތެރެއިން 6.6 މިލިއަން ރުފިޔާ (%44.3) ވަނީ އަނބުރާ ހޯދައި ވެރިފަރާތްތަކާ ހަވާލުކޮށްފައެވެ. އެގޮތުން 850 މީހުންނަށް އަތުން ގެއްލުނު ފައިސާ އެއްކޮށް ރައްދުކޮށްދެވިފައިވާއިރު، 320 މީހުންނަށް ފައިސާގެ މިންވަރެއް ވަނީ ހޯދައިދެވިފައެވެ.
މިއަހަރު ހުށަހެޅުނު މައިގަނޑު ސްކޭމްތައް:
-
އިންޓަނެޓް މެދުވެރިކޮށް ގަނެވިއްކުން: 821 މައްސަލަ
-
ބޭރު ފައިސާ މާރުކުރުން: 244 މައްސަލަ
-
ޝަހުސު އޮޅުވާލައިގެން ފައިސާ ހޯދުން: 213 މައްސަލަ
-
ބުކިން ކެންސަލްކޮށް ރިފަންޑް ހޯދުން: 80 މައްސަލަ (ރިސޯޓު، ހޮޓެލް އަދި ގެސްޓްހައުސްތަކަށް އަމާޒުކޮށްގެން)
މި މައްސަލަތަކާ ގުޅިގެން 48 ގަޑިއިރަށް 2,803 އެކައުންޓެއް ފްރީޒްކޮށް، ކޯޓު އަމުރުގެ ދަށުން އިތުރު މުއްދަތަށް 535 އެކައުންޓެއް ވަނީ ފްރީޒްކޮށްފައެވެ. އަދި 53 މީހަކު ހައްޔަރުކޮށް، 25 މައްސަލައެއް ޕްރޮސިކިއުޓްކޮށް، 4 މީހަކަށް މިހާރު ވަނީ ހުކުމް ކޮށްފައެވެ. ސްކޭމްގެ މައްސަލަތައް އެންމެ ގިނައިން ރިޕޯޓުކޮށްފައިވަނީ މާލެއިންނެވެ. ދެން އެންމެ ގިނައީ އައްޑޫ ސިޓީ، ރ. އަތޮޅު އަދި ކުޅުދުއްފުށި ސިޓީންނެވެ.
