ސިނަމާލެ ބުރިޖު މަތިން ކަނޑަށް ފުންމާލި ބިދޭސީއަކު އެމްއެންޑީއެފް ކޯސްޓްގާޑުން ސަލާމަތްކޮށް، ފުލުހުންނާ ހަވާލުކޮށްފިއެވެ. މި ހާދިސާގެ މައުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރަށް ލިބިފައިވަނީ ރޭ ދަންވަރު 00:44 ގައެވެ.
މައުލޫމާތު ލިބުމާއެކު އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން ވަނީ އެ ސަރަހައްދަށް ގޮސް އޭނާ ހޯދުމުގެ މަސައްކަތް ކޮށްފައެވެ. އެމްއެންޑީއެފުން ބުނި ގޮތުގައި، އެ މީހާ ފެނިފައިވަނީ ބްރިޖުގެ ތަނބެއްގައި ހިފަހައްޓައިގެން އޮއްވައެވެ. އެއަށްފަހު، ކޯސްޓްގާޑް ހާބާ ކްރާފްޓަށް އޭނާ ނަގައި، ސަލާމަތްތެރިކަމާއެކު ވަނީ ފުލުހުންނާ ހަވާލުކޮށްފައެވެ.
ސިނަމާލެ ބުރިޖުން ކަނޑަށް ފުންމާލުމުގެ ހާދިސާތައް މީގެ ކުރިންވެސް މަދުން ނަމަވެސް ހިނގާފައިވާއިރު، މެއި 2، 2023 ގައިވެސް ބުރިޖުމަތިން ކަނޑަށް ފުންމާލި މީހަކު ސަލާމަތްކޮށް ފަރުވާދީފައިވެއެވެ.
