ދިވެހި ވަޠަނީ ޚިދުމަތް (ނޭޝަނަލް ސަރވިސް) ގެ ތިންވަނަ ބެޗުގެ އަސާސީ ތަމްރީނުތައް ނިންމައި 341 ދަރިވަރުން ވަނީ ދަސްވެނިވެފައެވެ. ޅ. މާފިލާފުށީގައި ހުންނަ އެމްއެންޑީއެފްގެ ކޮމްޕޮސިޓް ޓްރެއިނިން ސެންޓަރުގައި ބޭއްވި މި ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދުއެވެ.
މިދިޔަ މެއި މަހުގެ 17 އިން ފެށިގެން 15 ހަފުތާގެ މުއްދަތަށް ކުރިއަށްގެންދިޔަ މި ތަމްރީނު ޕްރޮގްރާމުގައި ރާއްޖޭގެ 112 ރަށަކުން ޖުމުލަ 352 ކެޑޭޓުން ބައިވެރިވިއެވެ. އޭގެ ތެރެއިން ތަމްރީނުތައް ފުރިހަމަކޮށް ދަސްވެނިވީ 279 ފިރިހެން ދަރިވަރުންނާއި 62 އަންހެން ދަރިވަރުންނެވެ.
މި ތަމްރީނު ފުރިހަމަކުރި ދަރިވަރުންނަށް ނޭޝަނަލް ސަރވިސް އިނީޝިއަލް ޓްރެއިނިންގ ސެޓްފިކެޓުގެ އިތުރުން ސިވިލް އެޑިއުކޭޝަން އެންޑް ލީޑަރޝިޕް، ކޮމިއުނިޓީ ވޮލަންޓިއަރ ފަޔަރ ފައިޓިންގ، ބޭސިކް ފަސްޓް އެއިޑް އަދި ޕިއަރ އެޑިއުކޭޝަންގެ ސެޓްފިކެޓްތައް ވަނީ ދީފައެވެ. އަދި މި ބެޗުން ހޮވާލެވޭ ދަރިވަރުންނަށް ބ. ކިހާދޫގެ ޓެކްނިކަލް އެންޑް ވޮކޭޝަނަލް ސެންޓަރުގައި ފަންނީ ތަމްރީނު ފުރިހަމަކުރުމުގެ ފުރުސަތު ލިބިގެންދާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި މި ޕްރޮގްރާމުގެ ކުރީގެ ދެ ބެޗުން ކޮންމެ ބެޗަކުން 344 ދަރިވަރުން ދަސްވެނިވެފައިވާއިރު، މިހާރު ދަނީ 4 ވަނަ ބުރުގެ ތަމްރީނުތަކަށް ދަރިވަރުން ސެލެކްޓްކުރުމުގެ މަރުހަލާ ކުރިއަށްގެންދަމުންނެވެ.
