މާލެއިން ފުރައިގެން ރ. އަތޮޅުގެ ރިސޯޓަކަށް ދަތުރުކުރަމުންދަނިކޮށް ކާށިދޫ ކަނޑަށް ދިޔަވާން ފެށި ސަޕްލައި ދޯންޏާއި، އޭގައި ތިބި މީހުން ފުލުހުންގެ އެހީތެރިކަމާއެކު ރައްކާތެރިކަމާއެކު ބ. އޭދަފުއްޓަށް ގެންގޮސްފިއެވެ. ފުލުހުން މައުލޫމާތު ދެއްވާ ގޮތުގައި "ސީލައިން 3" ނަމަކަށް ކިޔާ މި ދޯނީގައި ތިބި ހަތަރު މީހުންގެ ހާލުވެސް ރަނގަޅެވެ.
މި ހާދިސާ ހިނގަން މެދުވެރިވީ ދޯނީގައި ބަރުކޮށްފައި ހުރި ލަކުޑިތައް ހިފެހެއްޓުމަށް އަޅާފައިވާ ބެލްޓު ކަނޑައިގެންގޮސް ދޯނި އަރިއަޅާލައި ދިޔަވާން ފެށުމުންނެވެ. މިއަދު ހެނދުނު 09:57 ހާއިރު މި ހާދިސާގެ ރިޕޯޓު ލިބުމާއެކު، އެންމެ ކައިރީގައިވާ ބ. އޭދަފުށީ ޕޮލިސް ސްޓޭޝަންގެ ލޯންޗެއް ވަނީ އެ ސަރަހައްދަށް ގޮސް އެހީތެރިކަން ފޯރުކޮށްދޭން ފަށާފައެވެ.
ދޯނި ސަލާމަތްކުރުމަށްޓަކައި ދޯނީގައި ހުރި ބައެއް މުދާ ވަނީ ކަނޑަށް ދޫކޮށްލާފައެވެ. މި ދޯނީގައި ދަތުރުކުރި ހަތަރު މީހުންގެ ތެރޭގައި ހިމެނެނީ ތިން ދިވެހި ފިރިހެނުންނާއި ބިދޭސީ ފިރިހެނެކެވެ.
