ދައުލަތުގެ ޚަރަދުތައް ހަމަޖެއްސުމަށްޓަކައި 645 މިލިއަން ރުފިޔާގެ ޓީބިލް ވިއްކުމަށް ފިނޭންސް މިނިސްޓްރީން އިއުލާންކޮށްފިއެވެ.
މި ފަހަރު ވިއްކުމަށް ހުޅުވާލާފައިވަނީ ހަތަރު މުއްދަތަކަށް ބަހާލެވިފައިވާ ޓީބިލްތަކެކެވެ. މީގެ ތެރޭގައި 3.5 އިންސައްތައިގެ އިންޓްރެސްޓް ރޭޓުގައި 28 ދުވަހުން އަނބުރާ ދައްކާގޮތަށް ވިއްކާ 265 މިލިއަން ރުފިޔާގެ ޓީބިލާއި، 3.87 އިންސައްތައިގައި 98 ދުވަހުން ދައްކާ 50 މިލިއަން ރުފިޔާގެ ޓީބިލާއި، 4.23 އިންސައްތައިގައި 182 ދުވަހުން ދައްކާ 247 މިލިއަން ރުފިޔާގެ ޓީބިލްގެ އިތުރުން 4.6 އިންސައްތައިގެ އިންޓްރެސްޓުގައި އެއް އަހަރުން އަނބުރާ ދައްކާގޮތަށް ވިއްކާ 83.4 މިލިއަން ރުފިޔާގެ ޓީބިލް ހިމެނެއެވެ.
ފިނޭންސް މިނިސްޓްރީގެ ތަފާސްހިސާބުތައް ދައްކާގޮތުން ސަރުކާރުން އަނބުރާ ދައްކަންޖެހޭ ޓީބިލުގެ ޖުމްލަ އަދަދު މިހާރު ވަނީ 41.6 ބިލިއަން ރުފިޔާއަށް އަރާފައެވެ. އަދި މިދިޔަ މަހުގެ 27 އާ ހަމައަށް ދައުލަތަށް 27.9 ބިލިއަން ރުފިޔާގެ އާމްދަނީއެއް ލިބިފައިވާއިރު، ދައުލަތުގެ ޚަރަދުތައް ވަނީ 29.96 ބިލިއަން ރުފިޔާއަށް އަރާފައެވެ. ދައުލަތުގެ ހޭދައިގެ ބޮޑު ބައެއް ހިއްސާކުރަނީ މުސާރައާއި އިނާޔަތްތަކުގެ އިތުރުން ހިންގުމުގެ ޚަރަދުތަކެވެ.
