ދާދިފަހުން ހިނގައިދިޔަ ހިތާމަވެރި ހާދިސާތަކާ ގުޅިގެން، ކަމާބެހޭ އިދާރާތަކުން ކަށަވަރުކޮށްދީފައިނުވާ މައުލޫމާތާއި، ހާދިސާތަކުގައި އަސަރުކޮށްފައިވާ ފަރާތްތަކުގެ އަބުރާއި ކަރާމާތަށް އުނިކަން ލިބޭފަދަ ލިޔުންތަކާއި ފޮޓޯ އަދި ވީޑިއޯ މީސްމީޑިއާގައި ނުފެތުރުމަށް އިޖުތިމާއީ އެހީއާއި ބެހޭ ވުޒާރާއިން އިލްތިމާސްކޮށްފިއެވެ.
އެ ވުޒާރާއިން ނެރުނު ނޫސްބަޔާނެއްގައި ފާހަގަކޮށްފައިވާ ގޮތުގައި، ކުޑަކުދިންގެ ޒާތީ މައުލޫމާތާއި އެކުދިންގެ ކަރާމާތަށް އުނިކަން ލިބޭފަދަ މައުލޫމާތު އާންމުކުރުމަކީ ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނުގެ ދަށުން މަނާކަމެކެވެ. އަދި ހަގީގަތާ ހިލާފު ވާހަކަތައް ފެތުރުމުގެ ސަބަބުން އަސަރުކޮށްފައިވާ ކުޑަކުދިންނަށާއި އާއިލާތަކަށް ނަފްސާނީ އިތުރު ހިތްދަތިކަމާއި ނުތަނަވަސްކަން ކުރިމަތިވާނެކަމަށްވެސް ބުނެފައިވެއެވެ.
ޚާއްޞަކޮށް ނުކުޅެދުންތެރިކަން ހުންނަ ފަރާތްތަކާއި އެފަރާތްތަކުގެ އާއިލާތަކުގެ ޒާތީ މައުލޫމާތު ހާމަކުރުމަކީ އެފަރާތްތަކުގެ ހައްޤުތަކަށް އަރައިގަނެވި، މުޖުތަމަޢުގައި ތަފާތުކުރުންތަކަށް މަގުފަހިވާނެ ކަމެއްކަމަށް ބުނެ، ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ކައުންސިލުންވެސް ވަނީ ކަންބޮޑުވުން ފާޅުކޮށްފައެވެ. އެހެންކަމުން މީސްމީޑިއާގެ ބޭނުންކުރުމުގައި ޒިންމާދާރުވެ، އަސަރުކޮށްފައިވާ އާއިލާތަކަށް ބޭނުންވާ އެއްބާރުލުމާއި ވަގުތު ދިނުމަށް އެ ވުޒާރާއިން ވަނީ އެދިފައެވެ.
